པར་རིས། དེ་ལས་མང་།
རིག་གནས། གཙོ་ངོས།གཙོ་ངོས།རིག་གནས།

 

གསོ་བྱེད་ནད་འབུམ་ནག་པོ་ལས་སྙིང་ནད་གསོ་བའི་མན་ངག་བཞུགས་སོ།། 

    

[རྩོམ་གྱི་ཡོང་ཁུངས། ངེད་དྲ་བ།] [མཛད་པ་པོ།  སྟོན་པ་གཤེན་རབ་མི་བོ།] [ཟླ་ཚེས། 11-12-21] [ཀློག་གྲངས། 356]

   དེ་ནས་ཡང་དཔྱད་བུ་ཁྲི་ཤེས་ཀྱིས་གསོལ་པ།  ཀྱཻ་འཚོ་མཛད་སྨན་པའི་རྒྱལ་པོ་ལགས།  །དོན་སྣོད་གསོ་བའི་མདོ་གནས་བསྟན་དུ་གསོལ།  །དེ་ནས་སྟོན་པས་བཀའ་སྩལ་པ།  །དཔྱད་བུ་ལ་སོགས་གསོ་བ་འཛིན་པ་རྣམས།  །དོན་སྣོད་བྱ་བའི་མདོ་གནས་བྱ་བ་ནི།  །སྙིང་དང་གློ་བ་མཆིན་འཚེར་མཁལ་མ་ལྔ།  །ཕོ་བ་རྒྱུ་མ་ལོང་ཁ་ནད་བརྒྱད་ནི།  །རྒྱལ་བློན་འཁོར་གྱིས་ཚུལ་དུ་སོ་སོར་བཅོས།  །ཐོག་མར་དོན་གྱི་རྒྱལ་པོ་སྙིང་བཅོས་བསྟན།  །རྒྱུ་དང་དབྱེ་བ་རྟགས་དང་བཅོས་ཐབས་བཞི་བསྟན་ན།  །རྒྱུ་ནི་མྱ་ངན་འཁྲུགས་པས་ཡིད་མི་བདེ།  །ལྟོ་བ་གཉིད་ཆག་ཞེ་སྡང་སེམས་མ་ནོན།  །གཉིས་པ་དབྱེ་ན་སྙིང་འཕྱོ་སྙིང་གཟེར་དང་།  །སྙིང་ཚད་སྙིང་འཐིབས་སྙིང་སྲིན་དང་།  །སྙིང་ནད་ཁ་ལེ་ནག་པོ་དེ་དང་བདུན།  །གསུམ་པ་རྟགས་ནི་སྙིང་འཕྱོ་མགོ་ན་བརྗེད་ངེས་ཆེ།  །ཤེས་པ་འཕྱོ་ཞིང་གལ་མེད་སྙིང་མི་དགའ།  །རེས་འགའ་མ་དྲི་བར་ཡང་རླབ་ཆོལ་སྨྲ།  །རེས་འགའ་དྲིས་པ་གཏམ་གྱི་ལན་མི་འབྱོར།  །མི་སྙན་ཚིག་སོགས་ཚེར་བསྔངས་ཁ་ཤུས་འདེབས། །དབུགས་ཐུང་གཉིད་ཆུང་སྙིང་ཉིད་སྟོང་སྙམ་བྱེད།  །སྙིང་གཟེར་ནད་ལ་རླུང་གཟེར་ཁྲག་གཟེར་གཉིས།  །རླུང་གཟེར་མགོ་འཁོར་སྟོད་རྒྱས་རྔམ་པ་ཐུང་།  །མིག་རྩ་རྒོད་ཅིང་ཁ་ལྕེ་སྩུབ་ལ་སྐམ།  །ཁྲག་གཟེར་ལྕེ་སྐམ་ཕུར་པ་བཙུགས་ལྟར་གཟེར།  །འབྲི་ཚུགས་ལེགས་ལྟ་རྔམ་རྒོད་ཞེན་པ་འཁུན།  །སྙིང་ནད་ཚ་བ་རྒྱས་དང་གྲང་འཁྱིལ་གཉིས།  །རྒྱས་པ་མྱོས་འཐིབ་མྱིག་དམར་རོ་སྟོད་གཟེར།  །སྙིང་ཆུའུ་སྣ་སྐམ་བྲང་རྒྱབ་མེ་བཏང་འདྲ།  །ཚ་བ་སྙིང་ལ་འཁྱིལ་ན་ཚ་རྒྱས་བྱེད།  །སྙིང་འཕར་ཁྲིའི་གཏུབ་སྙམ་ལྕེ་ཐུང་བྲོས།  སྙིང་ལ་ཆུ་སེར་བབས་ན་སྨྲ་བ་མང་། །ཁོག་འདར་གཉིད་ཆུང་སྙིང་བརྡུང་གཡལ་སྟེང་གཡོའ།  །གླུ་དང་རྒོད་ལ་དགའ་སྟེ་ཚིགས་པ་འཁྲུག།  །སྙིང་འཐིབས་བརྗེད་ངེས་སེམས་སྨུགས་ཤེས་པ་ལྗི།  །དང་ཁ་མི་བདེ་གཉིད་ཆེ་རྡོ་གཙོང་སེམས།  །སྲིན་གྱུར་མིག་འདོག་ནག་ལ་ལྗན་ལྗིན་མང་། །སྙིང་འཕར་མུན་འཐིབས་སོག་ལེས་འབྲད་སྙམ་བྱེད།  །ཁ་ནག་རྩ་སྟོན་ཚད་པ་ཆེ་བ་ལ།  །སྤྲོ་ཐུང་བརྡེགའདོད་སྨྲ་ཉུང་སྡང་མིག་སྟེ།  །མགོ་བོ་ཕྱེད་ན་ན་ངོས་ཁ་ཡོ་འོང་།  བཞི་པ་སྙིང་འཕྲོས་དེ་ཡི་བཅོས་ཐབས་ནི།  །དང་པོ་སྙིང་ལ་དེ་ལྟར་རླུང་ཞུགས་པས།  །འབྲས་བུ་མར་གྱི་བཟའ་བྱུག་འཇམ་རྩིར་བཏང་།  །ཛྭ་ཏི་ཁ་རུ་ཚའི་སྨན་མར་རམ།  །སྐྱེས་པ་དར་མའི་རུས་པའི་ལྷ་རྐང་མར།  འབྲས་བུ་གསུམ་གྱི་མར་བསྲེས་ཞུན་བྱས་ལ།  །ཤིང་ཀུན་ཛྭ་ཏི་ཁ་རུ་ཚ་དང་སྒ།  །སླེ་ཁྲེས་གོ་སྙོད་བུར་སྙིང་བཏབ་ལ་བཏུང་།  ཧ་ལ་ཆ་གཅིག་ཨ་རུ་ར་ལ་བརྒྱད།  གླ་རྩི་རུ་རྟ་ཤིང་ཀུན་ཆུ་དག་དང་།  ཛྭ་ཏི་གུ་གུལ་རྣམས་ལ་ཐུན་རེ་ལ།  །བུ་རིམ་སྦྱར་བའི་རིལ་ལུ་སྒྲིལ་ཐབས་བསྟན།  །བདུན་དྲུག་སྙིང་སྟོད་ལོགས་ལ་མེ་ཐུར་བཏང་།  །བུ་མེད་སྨྲ་བརྗོད་མི་སྙན་ཐོག་མེད་སྤང་།  །རླུང་གཟེར་ཛྭ་ཏི་གོ་སྙོད་ཞོ་ཤའི་ཐང་།  །ཕྱེ་མ་དེའི་སྟེང་དུ་རུ་རྟ་ལི་ཤི་དང་།  །ཀ་ཀོ་ལ་དང་ཤིང་ཀུ་བུ་རམ་སྦྱར།  །སྙིང་གསང་མདུན་རྒྱབ་གང་གཟེར་མེ་ཡིས་བསྡམ།  །ཁྲག་གཟེར་ཞོ་ཤ་སླེ་ཏྲེས་ཨ་རུའི་ཐང་།  །ཕྱེ་མ་ཙན་དན་དཀར་དམར་སྙིང་ཞོ་ཤ།  །གེ་སར་གཉིས་དང་ཛ་ཏི་ཀ་ར་སྦྱར།  །ཨ་སོ་རྩེ་ཆུང་གཏར་ལ་བདུན་དྲུག་བསྲེག  །བཅོས་འཕྱིས་སྙིང་ནང་ཁྲག་གིས་གང་ནས་འཆི།  །སྙིང་ལ་ཚ་བ་རྒྱས་ན་སྙིང་རྩ་གཏར།  །ག་ཕུལ་བདུན་དགུ་ཉི་ཤུ་ལྔ་པ་སྦྱར།  ཚ་བ་འཁྱིལ་ན་ག་བུར་སྙིང་ཞོ་ཤ།  ཛྭ་ཏི་ཇུ་གང་དམ་འཁྲིས་ཀ་ར་སྦྱར།    །ཐོང་པོའི་ཨ་སོ་ལྕེ་འོག་རྩ་ལ་གཏར།  །སྙིང་གི་ཆུ་སེར་འབྲུ་ཡི་ཕྱེ་མ་སྦྱར།  དཀར་ནག་མཚམས་དང་བདུད་ཁུང་བདུན་པ་བསྲེག  །འབྲས་གསུམ་སེང་ལྡིང་མར་གྱིས་ཆུ་སེར་སྐེམ།  བད་ཀན་མ་ཞུ་སྙིང་འཐིབས་སྟོད་བཏང་།  །སེལ་འབྲུ་དབྱི་མོང་ཚ་བ་གསུམ་གྱི་ཐང་།  །རྒྱམ་ཚ་དྲོད་སྨན་ཁ་རུ་ཚ་ཐང་བཏང་།  །ཤུ་དག་རྒྱམ་ཚ་ཤིང་ཀུན་ཁ་རུ་ཚ།  །དོང་གྲ་སུག་མེ་ཡ་བག་ཤ་ར་དང་།  །ལ་ལ་ཕུད་དང་དྲོད་སྨན་སྦྲང་སྦྱར་བཏང་།  སྙིང་སྲིན་བྱི་ཏང་ཀ་དང་ཤིང་ཀུན་དང་།  །མེ་རུ་རྩེ་དང་སྒོག་སྐྱ་ལང་ཐང་རྩེ།  །འཛྭའ་ཏི་ཞོ་ཤ་སྤྲུ་མའི་ཁུ་བས་དབུལ།  །ཁ་ལེ་ནག་པོ་སྐྱུ་རུ་རའི་ཐང་།  །རྒོད་ཀྱི་ལྟོ་སྟོང་པ་ཡི་ཚ་བ་བཏང་།  །ཞོ་ཤ་གསུམ་གྱི་མར་དང་སྦྱར་ཏེ་བཏང་།  །མཐེབ་མཛུག་བར་གྱི་སྙིང་གསང་མེ་ཡིས་བསྲེག    །ཅེས་གསུངས་སོ།།