རྒྱ་ནག་གླང་ཆེན་འགྱིང་རིའི་སྐོར།

རྒྱ་ནག་གླང་ཆེན་འགྱིང་རི་ནི་ཟི་ཁྲོན་ཞིང་ཆེན་གླང་འགྱིང་གྲོང་ཁྱེར་གྱི་ཁོངས་སུ་ཡོད།དབུ་རྩེར་རྒྱ་མཚོའི་ངོས་ལས་མཐོ་ཚད་སྤྱི་ཁྲེ་སུམ་སྟོང་བརྒྱ་མེད་དགུ་བཅུ་ཐམ་པ་ཡོད་ཅིང་། དེ་ནི་བླ་ཆེན་དྲན་པ་ནམ་མཁའ་དང་འགྲོ་མགོན་ཚེ་དབང་རིག་འཛིན་ཆེན་པོ་སོགས་ཀྱིས་བྱིན་གྱིས་བརླབས་པའི་གནས་རི་ཡིན་ཏེ། ཚེ་དབང་གནས་བརྒྱད་ལས། རྒྱ་ནག་ཡུལ་གྱི་ལྷོ་ཕྱོགས་ཀྱི། །གླང་ཆེན་འགྱིང་པའི་རི་བོ་ལ། །འགྲོ་མགོན་ཚེ་དབང་རིག་འཛིན་བཞུགས། །ཞེས་དང་། གླང་ཆེན་འགྱིིང་རིའི་དཀར་ཆག་དག་སྣང་མཁའ་འགྲོ་རྒྱ་མཚོ་ཞུ་ལེན་ལས། སྔོན་ཚེ་ཚེ་དབང་རིག་འཛིན་གྱིས།།གནས་མཆོག་འདི་རུ་སྒྲུབ་པ་མཛད།།རྒྱ་ལྕམ་མཁའ་འགྲོ་གྲོགས་སུ་བསྟེན།།གསང་སྔགས་ཟབ་མོའི་དངོས་གྲུབ་བརྙེས།།གཞན་ཡང་མཁས་བཞི་ལོ་པན་རྣམས།།མཁའ་ལ་འཕུར་ནས་གནས་འདིར་བབ།།མི་འགྱུར་བཀའ་རྟགས་རེ་རེ་བཞག།།གནས་མཆོག་གླང་ཆེན་འགྱིང་རི་འདི།།རྩེ་མོ་རིན་ཆེན་གཡུ་སྟེང་ཚལ།།སྐེད་པ་ཚལ་རི་དབལ་གྱི་བྲག།།རྩ་བ་སེང་གེ་བརྒྱད་བསྣོལ་ཚུལ།།ཞེས་དང་། ཀོའུ་གཉན་ཞེས་པའི་རི་བོ་ལ། །རྒྱ་བོན་ཟིང་པའི་སྐུ་རྗེས་ཡོད། །ཝ་གཉེན་ཞེས་པའི་དགོན་པ་རུ། །ཚེ་དབང་ཆེན་པོའི་སྐུ་གཟུགས་དང་། །སངས་རྒྱས་སྟོང་གི་རིང་བསྲེལ་ཡོད། །ཅེས་གསུངས། བློ་ལྡན་ཟུར་བྱང་ལས། རྒྱ་ནག་གླང་ཆེན་འགྱིང་རི་ལ། མཆོད་པ་རྣམ་ལྔ་ཕུལ་བས་ན། །དུས་གསུམ་ཕ་མའི་དྲིན་ལན་བསབས། ཞེས་ལུང་གིས་ཟིན་པའི་གཡུང་དྲུང་བོན་གྱི་གནས་རི་རྩ་ཆེན་ཞིག་ཡིན།། །།

རྒྱ་ནག་གླང་ཆེན་འགྱིང་རིའི་དཀར་ཆག་དག་སྣང་མཁའ་འགྲོ་རྒྱ་མཚོའི་ཞུས་ལེན་ཞེས་བྱ་བ་བཞུགས་སོ། །

རིག་འཛིན་ཀུན་བཟང་བསྟན་འཛིན།

  ཨཿ སྤྲོས་བྲལ་བློ་འདས་རང་རིག་བོན་གྱི་སྐུ། །འོད་གསལ་ལྷུན་གྲུབ་རང་སྣང་ལོངས་སྤྱོད་རྫོགས། །གང་འདུལ་ཐུགས་རྗེ་སྲིད་འགྲོ་ཐར་པ་འདྲེན། །རྒྱལ་བ་སྲས་དང་བཅས་ལ་གུས་ཕྱག་འདུད། །རྒྱ་ནག་ཡུལ་གྱི་བྱང་ཤར་མཚམས་གནས་མཆོག་གླང་ཆེན་འགྱིང་རིའི་མདུན་ཝ་གཉན་(万年)ཞེས་པའི་དགོན་པ་རུ། །ནུབ་གཅིག་འདུག་པའི་འོད་གསལ་མཚམས་རང་སྣང་མཁའ་ལྟར་དག་པའི་ངང་རང་རིག་སྒོམ་མེད་གཡེང་མེད་ཀློད། རང་གདངས་ལྷག་མཐོང་སྐུ་བཞེངས་པ། རིག་འཛིན་ཚེ་དབང་ཆེན་པོ་ནི་པད་དཀར་འདབ་མ་བརྒྱད་ཀྱི་སྟེང་། གཞོན་ཚུལ་འཛུམ་བག་ཞལ་མདངས་བསྟན། དབུ་སྐྲ་དབུ་ཐོད་རིན་ཆེན་རྒྱན། སྐུ་སྟོད་རྒོད་ཀྱི་ཐུལ་པ་གསོལ། རུས་རྒྱན་རིན་ཆེན་མགུལ་ཆུས་བརྒྱན། ཕྱག་གཡས་སྐྱེ་མེད་ཨ་དཀར་འཛིན། གཡོན་པས་གསེར་གྱི་གཡུང་དྲུང་ནི། འོད་དུ་འཕྲོ་བ་ཐུགས་ཀར་བསྣམས། །སྐུ་སྨད་སྟག་ཤམ་ཞབས་ཕྱེ་དཀྱིལ། །ཡུམ་ཆེན་ཐུགས་རྗེ་ཀུན་གྲོལ་མ། །དམར་མོ་རྒྱ་ཚལ་ཐིག་པའི་མདོག །གཅེར་བུ་དར་དང་རུས་པའི་བརྒྱན། །ཡབ་ཀྱི་པང་གཡས་འཁྲིལ་བཞིན་བཞུགས། །མཁྱེན་བརྩེ་ནུས་གསུམ་རང་བཞིན་ཅན། །ཞལ་གྱིས་བདག་ལ་ཕྱོགས་ཞིང་བཞད། །བདག་བློ་མོས་འདུན་གུས་པ་ཡིས། །ཕྱི་ནང་ཚོགས་ཀྱི་མཆོད་པ་ཕུལ། །གསོལ་བཏབ་དབང་བཞི་བྱིན་རླབས་ཞུས། །ཡབ་ཡུམ་དེ་གཉིས་འོད་དུ་ཞུ། །མི་དམིགས་རང་ཡལ་ངང་དུ་སོང་། །སླར་ཡང་སྟོང་བའི་སྒྲ་ཡི་བརྒྱུད། །ཌཱཀྐི་བརྡ་ཡིག་ཚིག་འདི་ཐོས། །མ་མ་ཌཱཀྐི་ས་མ་ཡ། ཡེ་ཤེས་དབྱིངས་ལས་སྒྱུ་འཕྲུལ་གར། །ཐུགས་རྗེ་ཚད་མེད་མཁྱེན་པའི་མ། །ཐུགས་རྗེ་ཀུན་གྲོལ་འགྲོ་ཀུན་གསོ། །རིགས་ལྔའི་མཁའ་འགྲོ་འཁོར་དང་བཅས། །མཁའ་སྤྱོད་བདེ་ལྡན་གསང་གནས་སུ། །ཚོགས་ཀྱི་འཁོར་ལོ་བསྐོར་བའི་དུས། །བདག་ནི་ཁྱེད་ཉིད་བསུ་མར་མངགས། །སྐལ་ལྡན་རིགས་མཆོག་སྔགས་ཀྱི་སྲས། །སྐྱེ་བ་གོང་ནས་ལས་འཕྲོ་སད། །ད་ལྟ་གསང་གནས་འདི་རུ་མཇལ། །བདག་ནི་ཁྱེད་དང་དམ་ཚིག་གཅིག །སྔོན་འབྲེལ་བཟང་བོའི་མཐུ་བརྟས་ནས། །རྟེན་འབྲེལ་དབང་བཞི་སྒོ་ཡང་འབྱེད། །གསང་སྔགས་སྒྲུབ་པའི་དངོས་གྲུབ་དང་། །ཌཱཀྐི་མཁའ་འགྲོའི་ལུང་བསྟན་རྣམས། །རིགས་མཆོག་སྐལ་ལྡན་ཁྱེད་ལ་གཏད། །ཟབ་ལམ་སྔགས་ཀྱི་ཐེག་པ་དང་། །རྫོགས་ཆེན་བོན་གྱི་ཟབ་གདམས་རྣམས། །གསང་རྒྱ་ཡོལ་ནས་བཀའ་རྒྱ་ཁྲོལ། །ཟབ་མོ་བདེན་ཚིག་གཡུང་དྲུང་རིས། །ཌཱཀྐི་གྲོགས་ཀྱི་རྟེན་འབྲེལ་གནད། །དགའ་བཞི་ཐབས་སྦྱོར་རླུང་སེམས་བཟུང་། །དེ་ཡིས་གསང་བའི་བརྡ་ལས་ཁྲོལ། །ཞེས་གསུངས། གྲགས་སྟོང་རང་ཡལ་སོང་། ཡུད་ཙམ་གཏད་མེད་ཧ་རེར་ལུས། སླར་ཡང་སྟོང་བའི་རང་སྒྲ་གྲགས། །འོད་ཟེར་སྨུག་པོ་མདའ་གང་ཞིག །ནུབ་ཀྱི་ཕྱོགས་ནས་ཐལ་ལེར་བྱུང་། །མཁའ་འགྲོ་སྔོན་མོ་རུས་རྒྱན་ཅན། །ཞལ་ནས་བདག་ལ་འདི་སྐད་གསུངས། །རིགས་མཆོག་སྐལ་ལྡན་ལྷ་ཡི་སྲས། །གསང་སྔགས་དམ་ལྡན་དབང་བཞི་མཛོད། །ཟབ་མོ་རྫོགས་ཆེན་དགོངས་ཀློང་རྡོལ། །ཡང་རྩེ་རྣལ་འབྱོར་བདག་ལ་གསོན། །ད་ལྟ་བཞུགས་པའི་གནས་མཆོག་འདི། །རི་ནི་གླང་ཆེན་འགྱིང་བའི་རི། །ཕོ་བྲང་དགའ་ལྡན་ཝ་གཉན་(万年)ཞེས། །སྔོན་ཚེ་ཚེ་དབང་ཆེན་པོ་ཡིས། །གནས་མཆོག་འདི་རུ་སྒྲུབ་པ་མཛད། །རྒྱ་ལྕམ་མཁའ་འགྲོ་གྲོགས་སུ་བསྟེན། །གསང་སྔགས་ཟབ་མོའི་དངོས་གྲུབ་བརྙེས། །གཞན་ཡང་མཁས་བཞི་ལོ་པཎ་རྣམས། །མཁའ་ལ་འཕུར་ནས་གནས་འདིར་བབས། །མི་འགྱུར་བཀའ་རྟགས་རེ་རེ་བཞག །གནས་མཆོག་གླང་ཆེན་འགྱིང་རི་འདི། །རྩེ་མོ་རིན་ཆེན་གཡུ་སྟེང་ཚལ། །སྐེད་པ་ཚལ་རི་དབལ་གྱི་བྲག །རྩ་བ་སེང་གེ་བརྒྱད་བསྣོལ་ཚུལ། །ཤར་གྱི་རི་ནི་གཡུང་དྲུང་དབྱིབས། །རིག་འཛིན་མཁའ་འགྲོའི་ཚོགས་གནས་ཡོད། །བྱང་གི་ཕྱོགས་སུ་ཁྲག་མཚོ་འཁྲུགས། །བསྟན་སྲུང་དམ་ཅན་སྤྲིན་བཞིན་འདུ། །ནུབ་ཀྱི་ཕྱོགས་སུ་སྦས་པའི་གནས། །སྟོང་ཚོ་ལྔ་ཤོངས་གྲོང་ཁྱེར་ཡོད། །ལྷོ་ཡི་ཕྱོགས་སུ་ནེའུ་གསིང་ཐང་། །རྒྱ་ཡི་གྲོང་ཁྱེར་ཆེན་པོ་ཡོད། །སྦས་ཚུལ་དཔའ་བོ་མཁའ་འགྲོ་ནི། །རྒྱུན་ཆད་མེད་པ་བཞུགས་པ་ཡོད། །༼ཀོའུ་གཉན་༽ཞེས་པའི་རི་བོ་ན། །རྒྱ་བོན་ཟིང་བའི་སྐུ་རྗེས་ཡོད། །ཝ་གཉན་(万年)ཞེས་པའི་དགོན་པ་རུ། །ཚེ་དབང་ཆེན་པོའི་སྐུ་གཟུགས་དང་། །སངས་རྒྱས་སྟོང་གི་རིང་བསྲེལ་ཡོད། །མི་མིན་སྔགས་སྒྲ་སྒྲོག་པ་དང་། །ཁ་རག་བདུད་རྩིའི་ཆུ་མིག་ཡོད། །ཚོགས་འབྲེལ་ངན་སོང་སྐྱེ་སྒོ་ཁེགས། །གཞན་ཡང་ལས་དག་སེམས་དཔའ་དང་། །མཐོང་ལམ་ཐོབ་པའི་རིག་འཛིན་གྱིས། །རི་རྩེར་འཇའ་འོད་ལས་གྲུབ་པའི། །ལྷ་ཡི་གཞལ་ཡས་ཆེན་པོ་ན། །རིག་འཛིན་མཁའ་འགྲོས་ཚོགས་འཁོར་བསྐོར། །རྟོགས་པའི་ཡེ་ཤེས་འཕེལ་བ་ཡོད། །ཤར་དུ་ཨར་མོའི་རྡོ་ལེབ་ལ། །ཟིང་བ་མཐུ་ཆེན་ཕྱག་བྲིས་ཡོད། །གཞན་ཡང་གནས་ཀྱི་བྱང་ཤར་ན། །སྦས་པའི་རིག་འཛིན་བརྒྱད་རྣམས་ཀྱིས། །བྲག་ལ་ཟང་ཐལ་ཕུག་པ་ཡོད། །༼ཧུང་གང་༽ཞེས་པའི་ཤིང་ཐོག་ན། །ཨ་ཡིག་རང་བྱོན་གསལ་བ་ཡོད། །སྔོན་ཚེ་ཀོང་ཙེ་འཕྲུལ་རྒྱལ་གྱི། །སྨོན་ལམ་སྟོབས་ལས་བྱུང་བ་ཡི། །གཤེན་རབ་སྐུ་ཚད་ཁྲུ་གང་ཡོད། །ཞལ་མཇལ་རིགས་དྲུག་སྐྱེ་སྒོ་ཁེགས། །གཞན་ཡང་གནས་མཆོག་འདི་ཉིད་ན། །ཚོགས་འབྲེལ་བྱུང་ན་དངོས་གྲུབ་ཐོབ། །དར་ཟབ་ཕུལ་ན་དབུལ་འཕོངས་སེལ། །རྣམ་ལྔ་ཕུལ་ན་མཚམས་མེད་འབྱོང་། །ཞལ་མཇལ་ཡི་དྭགས་ལུས་མི་ལེན། །སྨོན་ལམ་གང་བཏབ་མྱུར་དུ་འགྲུབ། །ཞེས་གསུངས། ཌཱཀྐི་སྔོན་མོ་ཡང་གར་སོང་མེད་པ་རང་ཡལ་དེངས། །བདག་ཀྱང་ཉམས་དགའ་ཤེས་པ་སྤྲོ། །དེ་ཡི་ནུབ་མོ་ནམ་གྱི་ཕྱེད། །མཁའ་འགྲོ་དཀར་མོ་རུས་རྒྱན་ཅན། །ཞལ་ནས་བདག་ལ་འདི་སྐད་གསུངས། །མ་འོངས་ཡུལ་གྱི་ཐ་མ་ན། །རྒྱ་ནག་ཡུལ་དུ་གཡུ་མོ་བཞད། །གཡས་འཁྱིལ་དུང་གི་རང་སྒྲ་གྲགས། །ཞྭ་སེར་ཅན་གྱི་མགོ་ཡང་དམའ། །ཁུ་བྱུག་གླང་བོའི་རི་ལ་དབང་། །རྒྱ་ཡི་ཡུལ་དུ་བོན་བསྟན་དར། །དེ་དུས་སྐལ་ལྡན་རྣལ་འབྱོར་ཁྱེད། །བཀའ་གཏེར་བསྟན་པའི་སྨིན་ཚད་ཡིན། །འབྲེལ་ཐོགས་འདྲེན་པ་གདོན་མི་ཟ། །ད་རེས་རྟེན་འབྲེལ་གནད་ཆེའོ། །མཐའ་རུ་ཕྱིན་ན་དངོས་གྲུབ་འབྱུང་། །ང་ནི་ཨུ་རྒྱན་མཁའ་འགྲོའི་གཙོ། །ཟླ་འོད་གཟི་འབར་ཞེས་བྱ་ཡིན། །གསུངས་ནས་ནུབ་ཀྱི་ཕྱོགས་སུ་ཡལ། །བདག་ཀྱང་དགའ་སྤྲོ་དཔག་མེད་སྐྱེས། །བདག་གིས་སྨོན་ལམ་འདི་ལྟར་བཏབ། །མི་བསླུ་ངེས་པའི་སྐྱབས་ཀྱི་མཆོག །གནས་བཞིའི་ལྷ་ཚོགས་ཐུགས་རྗེ་དང་། །བདག་གི་བསམ་པ་རྣམ་དག་གིས། །ཡངས་པའི་ཞིང་ཁམས་ཐམས་ཅད་དུ། །ཕྱོགས་མེད་གདུལ་བྱ་གྱུར་བར་ཤོག །ཐེག་དམན་ནོར་ལ་ཞེན་པ་དང་། །མཐའ་འཁོབ་གཡེང་བའི་ཡུལ་རྣམས་སུ། །བོན་གྱི་བསྟན་པ་དར་བ་དང་། །ཐེག་ཆེན་བཀའ་འཁོར་བསྐོར་བར་ཤོག །ནམ་ཞིག་ལྷོ་རྒྱལ་འཛམ་གླིང་འདིར། །ཕྱོགས་མེད་བོན་བསྟན་འཕེལ་རྒྱས་ནས། །འགྲོ་རྣམས་འཁོར་བ་ལས་གྲོལ་ཏེ། །ཐར་པའི་གྲོང་ཁྱེར་འཇུག་པར་ཤོག །ཅེས་རིག་འཛིན་ཚེ་དབང་ཆེན་པོ་མཇལ་སྣང་དང་། རྒྱ་ནག་གླང་ཆེན་འགྱིང་རིའི་དཀར་ཆག་དག་སྣང་མཁའ་འགྲོ་རྒྱ་མཚོའི་ཞུས་ལེན་ཞེས་པ་འདི་ཉིད་དུས་མཐའི་ཞིག་པོའི་རུས་ཐོབ་སྔགས་འཆང་ཅོལ་ཆུང་བ་ཀུན་བཟང་བསྟན་འཛིན་ནམ་ཌཱཀྐི་མཁའ་འགྲོའི་གསང་མཚན་གསང་བདག་མུ་ལ་རང་གྲོལ་རྩལ་གྱིས་རྒྱ་ནག་གླང་ཆེན་འགྱིང་རི་ཝ་གཉན(万年)ཞེས་པའི་དགོན་པར་དག་སྣང་གིས་ཕབས་པས་བསྟན་འགྲོ་ཕན་བདེ་འབྱུང་བའི་རྒྱུ་རུ་གྱུར་ཅིག 

ཨེ་མ་ཧོ། དུས་གསུམ་རྒྱལ་བ་སྲས་བཅས་ངོ་བོ་ཉིད། །གསང་བ་འདུས་པའི་ཐུགས་ལས་སྤྲུལ་བ་ཡི། །བླ་ཆེན་སྲས་མཆོག་ཚེ་དབང་འགྲོ་བའི་མགོན། །གནས་བརྒྱད་དཔའ་བོ་མཁའ་འགྲོས་འགྲོ་དོན་མཛད། །མི་དང་མི་མིན་གདུལ་བྱ་ཐབས་ཀྱིས་འདུལ། །རྒྱ་ནག་ཡུལ་གྱི་གླང་ཆེན་འགྱིང་རི་ན། །དགའ་ལྡན་ཝ་གཉན་(万年寺)ཞེས་པའི་དགོན་པ་རུ། །གསང་སྔགས་ཟབ་མོ་སྒྲུབ་པའི་དངོས་གྲུབ་བརྙེས། །མོས་གུས་གདུང་བ་དྲག་པོས་གསོལ་བ་འདེབས། །དབང་བཞི་བྱིན་རླབས་རྟོགས་པའི་ཡེ་ཤེས་ཕོབས། དོན་གཉིས་མཐའ་རུ་ཕྱིན་པར་མཛད་དུ་གསོལ། །ཅེས་ཚེ་དབང་ཐུགས་སྒྲུབ་སྙིང་གི་རྒྱ་ཅན་ལས། ཡུལ་ནི་ཤར་ཕྱོགས་རྒྱ་ནག་ཡུལ་གནས་མཆོག་གླང་ཆེན་འགྱིང་བའི་རི་གྲོང་ཁྱེར་ཆེན་པོ་ཝོ་མི་ཤིན(峨嵋县)ཕོ་བྲང་དགའ་ལྡན་ཝ་གཉན་ཧྲི(万年寺)ཅེས་དག་སྣང་ལུང་གིས་ཟིན་པའི་གནས་མཆོག་དེར། ཚེ་དབང་རིག་འཛིན་ཆེན་པོའི་སྐུ་བརྙན་རྒྱ་ནག་གི་ལུགས་སུ་བཞེངས་པའི་མདུན་དུ་སྙིགས་དུས་རིག་འཛིན་མུ་ལ་རང་གྲོལ་རྩལ་གྱིས་རྟེན་འབྲེལ་གསང་རྒྱ་བཏབས་ཏེ་ཤར་གྲོལ་གྱི་བརྡ་ལས་ཕབ་པ་དགེ་ཞིང་བཀྲ་ཤིས་འཕེལ་བར་གྱུར་ཅིག །