སྒང་རུ་དར་རྒྱས་དགོན་དུ་མཉམ་མེད་འཁྲུངས་སྐར་ལ་སྲུང་བརྩི་ཞུས་པ། |
[རྩོམ་ཁུངས།:ཁྱུང་པོའི་དྲ་བ།] [ཟླ་ཚེས།:2017-03-08] [རྩོམ་པ་པོ།:ཁྱུང་ལྔ་རིག་སློབ་གླིང་།] [ཀློག་གྲངས།:] |
སྒང་རུ་དར་རྒྱས་དགོན་དཔལ་གཤེན་བསྟན་གཡུང་དྲུང་གླིང་ངམ། ༼ཁྱུང་ལྔ་རིག་སློབ་གླིང་༽དུ་བདག་ཅག་གི་སྟོན་པ་བཀའ་དྲིན་ཅན་མཚན་བརྗོད་པར་དཀའ་བ་༧རྒྱལ་བ་གཤེན་རབ་མི་བོ་ཆེ་བདེ་བར་གཤེགས་ནས་མི་ལོ་༡༨༠༣༤ བོད་མེ་བྱ་ལོའི་སྤྱི་ལོ་ ༢༠༡༧ སྤྱི་ཟླ་ ༣ པའི་སྤྱི་ཚེས་ ༣ ཉིན་སྒང་རུ་སྡེ་དགོན་ཟུང་ནས་སྔར་སྲོལ་བཞིན། རྒྱལ་བ་གཉིས་པ་མཉམ་མེད་ཤེས་རབ་རྒྱལ་མཚན་རིན་པོ་ཆེའི་སྐུ་ཡི་འཁྲུངས་སྐར་སྲུང་བརྩི་ཟབ་མོ་ཞུས་པ་རེད། དགོན་དེའི་མཁན་པོ་དབྲ་ཁྱུང་སྐལ་བཟང་ནོར་བུ་དང་ཁྱུང་ཤེལ་ཉི་ཟླ་ཟུང་འབྲེལ་གཙོས་པའི་དགེ་འདུན་བརྒྱ་ཕྲག་ལྷག་གིས། སྐུ་གསུང་ཐུགས་ཀྱི་རྟེན་དང་རྣམ་ལྔ་སོགས་ཟབ་རྒྱས་ཀྱི་མཆོད་པ་བཤམ་ནས། མདོ་གཡུང་དྲུང་ཀློང་རྒྱས་སམ་མེ་ཏོག་མཆོད་པ་དག་འདོན་བྱས་པ་མ་ཟད། དེ་དང་ཁྱབ་གཅིག་སྐབས་གཉིས་པའི་གཤེན་གྱི་རྣལ་འབྱོར་བ་རྣམས་ཀྱི། ཨ་སྙན་རྫོགས་གསུམ་གྱི་སྒྲུབ་གྲྭ་བ་བཅུ་ཕྲག་གཉིས་ལྷག་གིས་ལོ་བཞིའི་རིང་སྔོན་འགྲོ་བསགས་སྦྱང་དང་། རྣལ་བབ་དང་རྩ་རླུང་གཏུ་མོའི་ཉམས་ལེན། མུན་ཁྲིད་འོད་གསལ་བདུན་སྐོར་སོགས་འཆད་ཁྲིད་ལེགས་པར་གྲུབ་ནས་ལོ་དུས་ཀྱི་བཅད་འཚམ་བཞིན་གཤེན་གྱི་རྣལ་འབྱོར་གྱི་མཚན་རྟགས་བཞེས་ནས། རྣལ་འབྱོར་བ་རེ་རེ་བཞིན་སྙན་པའི་དབྱངས་དང་སྤྲོ་དགའི་གར་དང་བཅས་ཏེ་དར་བུའི་སྒོ་ནས། མཚན་མོ་དགོན་གྱི་མཐའ་སྐོར་ལ་སྐྱ་སེར་བརྒྱ་ཕྲག་གྲངས་ཀྱི་ལག་ལ་མར་མེ་ཐོགས་ནས་ངག་གིས་རྗེ་རྒྱལ་བ་གཉིས་པའི་གསོལ་འདེབས་དབྱངས་ལ་བཅས་ནས་མཐར་བསྔོ་བ་སྨོན་ལམ་གྱི་མཇུག་གྲུབ་པ་རེད། ཁྱུང་ལྔ་རིག་སློབ་གླིང་ནས། |