ཁྱུང་པོ་སྟེང་ཆེན་དགོན་དུ་ཀུན་རིག་དང་དགེ་བཤེས་མཛད་སྒོ་སོགས་སྤེལ་བཞིན་ཡོད། |
[རྩོམ་ཁུངས།:ཁྱུང་པོའི་དྲ་བ།] [ཟླ་ཚེས།:2015-11-08] [རྩོམ་པ་པོ།:མཛད་སྒོའི་གོ་སྒྲིག་ཚོགས་ཆུང་ནས།] [ཀློག་གྲངས།:] |
ཁྱུང་པོ་སྟེང་ཆེན་དགོན་དུ་ཀུན་རིག་ལས་བཞི་རྒྱུན་ལྔ་རྒྱས་ཚོགས་དང་ དགེ་བཤེས་མཛད་སྒོ་སོགས་སྤེལ་བཞིན་ཡོད།
གཡུང་དྲུང་བསྟན་པའི་སྲོག་འཛིན་རྗེ།། མར་གྱུར་འགྲོ་བའི་དེད་དཔོན་དངོས།། སྐུ་ཚེ་བསྐལ་བརྒྱའི་དཔལ་བརྟན་སྨོན།། དུས་འགྱུར་ན་བུན་ཡལ་མཚམས་ནས།། གཡུང་དྲུང་བསྟན་གླིང་བཀྲ་གསལ་འོད།། ཞིང་འདིར་བསུ་བའི་རྗེ་བླ་མ།། ཤེས་དགེ་དམ་པ་སླར་ཡང་དྲན།། ཁྱུང་ཡུལ་ས་ཡི་ཐིག་ལེ་གནས་མཆོག་བྲག་དམར་རི་མདུན་ཞོལ་དུ་ཆགས་པའི་ ༧ དཔལ་གཤེན་བསྟན་ཁྱུང་དཀར་གཡུང་དྲུང་བསྟན་རྒྱས་གླིང་ངམ་ཡོངས་གྲགས་སུ་ཁྱུང་པོ་སྟེང་ཆེན་དགོན་དུ་འབོད་པའི་གཡུང་དྲུང་བོན་གྱི་གྲྭ་ས་འདིར། ༧ སྐྱབས་རྗེ་མཁན་རིན་པོ་ཆེ་ཚོགས་གཉིས་རྒྱ་མཚོའི་ནོར་བུའམ་འོད་ཟེར་སྦྱིན་པ་ཕུན་ཚོགས་མཆོག་གི་རྨད་བྱུང་ཐུགས་བསྐྱེད་རླབས་པོ་ཆེ་ལ་བརྟེན་ནས། བོད་འབྱུང་ལྡན་ ༣༠༡ གི་ཤིང་ལུག་ལོའི་ཟླ་ ༡༠ པའི་ཚེས་ ༥ སྟེ། སྤྱི་ལོ་ ༢༠༡༥ སྤྱི་ཟླ་ ༡༡ པའི་ཚེས་ ༡༦ ཉིན་ནས་དགོན་འདིའི་ལོ་དུས་ཀྱི་རིམ་གྲོ་ཁྲོ་ཕུར་བོན་སྐྱོང་སྒྲུབ་པ་དང་། དད་ལྡན་སྦྱིན་བདག་རྣམ་པས་འདོན་སྐུལ་ཕུལ་བའི་གསོན་གཤིན་དགེ་སྡོང་ཆེན་མོ་ཀུན་རིག་ལས་བཞི་རྒྱུན་ལྔའི་དགེ་སྒྲུབ་དངོས་སུ་དབུ་བཙུགས་ནས་རྒྱས་འཚོགས་བྱ་རྒྱུ་ཡིན། བསྟན་འཛིན་རྒྱུ་སྐར་བཀྲ་བའི་དབུས།། འཕྲིན་ལས་འོད་ཟེར་འབུམ་སྤྲོས་པས།། མཁན་མཆོག་འོད་ཟེར་སྦྱིན་པ་རྒྱལ།། དེ་ཡང་སྤྱི་ཚེས་ ༡༦-༡༧ གཉིས་ལ་མཆོད་བཀོད་བཅའ་བཟོ་དང་། སྤྱི་ཚེས་ ༡༨ ནས་ ༣༠ ཐམས་པའི་བར་སྒྲུབ་གཞུང་བསྲངས་ཏེ་འཚོགས་བཞིན་ཡོད། མཁས་བཙུན་བཟང་དང་འཆད་རྩོད་རྩོམ།། ཅི་དགར་བསྒྱུར་བའི་དགེ་བའི་བཤེས།། མཛད་འཕྲིན་ཟླ་བའི་འོད་འདི་དྲིན།། སྤྱི་ཚེས་ ༢༠ ནས་ ༢༥ བར་དགེ་བཤེས་དང་སྒྲུབ་ཐོན་རྣལ་འབྱོར་པའི་མཛད་སྒོ་ཡོད། སྤྱི་ཚེས་ ༢༣ ཉིན་གྱི་ཞོགས་པར་ << གསུང་རབ་སྒོ་མཛོད་རིན་པོ་ཆེའི་གླེགས་བམ>> གྱི་དཔེ་ཚོགས་ཆེན་མོ་གདན་འདྲེན་ཞུས་ཏེ་རབ་གནས་གསུང་རྒྱུ་དང་། ཕྱི་དྲོར་གཤེན་གྱི་བཀའ་རབ་འབྱམས་པ་རྣམ་པ་དམ་བཅའ་ཆེན་མོ་བཞུགས་རྒྱུ། ཉིན་གུང་ཆུ་ཚོད་༡-༣ བར་ལྷ་སྡེ་མི་མང་རྣམས་ལ་བོན་འཆད་ཁྲིད་སྤེལ་རྒྱུ་ཡིན། སྤྱི་ཚེས་ ༢༤ ཉིན་གྱི་སྔ་དྲོ་ལ་སྒྲུབ་ཐོན་རྣལ་འབྱོར་པའི་སྡེ་སྣོད་མཛོད་ཀྱི་ངག་རྒྱུགས་དང་བཤད་པ་འབུལ་བའི་མཛད་སྒོ་དང་། ཕྱི་དྲོར་རབ་འབྱམས་པའི་དངོས་གཞིའི་དམ་བཅའ་འཇོག་རྒྱུ་ཡིན། སྒོ་བཞི་མཛོད་དང་ལྔ་ཡི་བོན།། ས་ཡི་རྡུལ་བཞིན་གྲངས་འཕེལ་ནས།། འཛམ་གླིང་རྒྱན་དུ་སྤྲོས་འདི་རྨད།། སྤྱི་ཚེས་ ༢༦ ཉིན་གྱི་སྔ་དྲོར་འདི་ག་གཡུང་དྲུང་བོན་བཀའ་བརྟེན་དཔེ་རྙིང་ཕྱོགས་སྒྲིག་ཁང་ནས་བསྒྲིགས་ཏེ་ཀན་སུའུ་མི་རིགས་དཔེ་སྐྲུན་ཁང་ནས་བསྐྲུན་པའི་<< གསུང་རབ་སྒོ་མཛོད་རིན་པོ་ཆེའི་གླེགས་བམ >> ཞེས་པའི་གཡུང་དྲུང་བོན་གྱི་དཔེ་ཚོགས་དེབ་ཚོམས་ཆེན་མོའི་ཞལ་འབྱེད་མཛད་སྒོ་དང་འབྲེལ་དཔེ་ཚོགས་ཀྱི་རྩ་བའི་འགན་ཁུར་མི་སྣ་དང་སྦྱིན་བདག་རྣམས་ལ་གཟེངས་བསྟོད་ལེགས་གསོལ་དང་། ༢༠༡༥ ལོའི་བཤད་སྒྲུབ་འདུས་སྡེའི་ལོ་འཁོར་རྒྱུགས་འབྲས་ཨང་མཐོའི་སློབ་མ་རྣམས་ལ་གཟེངས་བསྟོད་ལེགས་མཚོན་འབུལ་རྒྱུ་བཅས་ཡིན། ཉིན་གུང་ ༡-༣ བར་དད་ལྡན་མང་ཚོགས་རྣམས་ལ་བོན་འཆད་ཁྲིད་སྤེལ་རྒྱུ་ཡིན། ཕྱི་དྲོར་འདི་གའི་བཤད་སྒྲུབ་འདུས་སྡེ་ནས་འདི་ལོའི་ལོ་འཁོར་བགྲོ་གླེང་ཆེན་མོ་འཚོགས་རྒྱུ། མཆོད་སྦྱིན་ཚོགས་བསགས་བྱས་པ་དང་།། རྨད་བྱུང་དགེ་མཚན་ཕྲག་བརྒྱ་ཡིས།། ཡངས་པའི་རྒྱལ་ཁམས་འདི་ཉིད་ཀྱི།། མི་མཐུན་རྒུད་ཚོགས་ཞི་བར་ཤོག། མཛད་སྒོའི་གོ་སྒྲིག་ཚོགས་ཆུང་ནས། ༢༠༡༥ ༡༡ ༡༩ |