འཕྲིན་གསར། གཙོ་ངོས།གཙོ་ངོས།འཕྲིན་གསར།
བསྟོད་ཚིག་དད་པའི་རང་མདངས།
[རྩོམ་ཁུངས།:ཁྱུང་པོའི་དྲ་བ།]   [ཟླ་ཚེས།:2015-08-16]  [རྩོམ་པ་པོ།:ཁྱུང་ཐོག་རྒོད།]  [ཀློག་གྲངས།:]

 

 

གངས་རི་ཞོ་སར་འདྲ་དེའི་ཕར་ཕྱོགས་ན།།
བྲག་རི་མཚལ་ཞུན་འདྲའི་དེའི་འགྱིང་ཁུག་ན།།
གྱེར་བསྟན་རྒྱ་མཚོ་བརྔུབས་པའི་ཉེར་ལེན་གྱིས།།
ཚོགས་གཉིས་ནོར་བུས་མཚན་པའི་ཟླ་གཞོན་ཞིག།
གཤེན་སྡེ་སྐར་ཚོམ་བསྟར་བའི་སུམ་གླང་གི།
གཡུང་དྲུང་ཁྲི་འཕང་བརྩེག་པའི་མཁའ་ནས་འཛུམ།།

 

གྲུབ་དབང་བླ་མའི་མཛོད་ཆེན་སྡེ་ལྔ་ཡིས།།
བཅུད་ནས་བཙག་པའི་ཟབ་གདམ་ཆུ་བོའི་ཕོན།།
མཁྱེན་དཔྱོད་གསེར་ནག་སྐྱོགས་ཀྱིས་ཉེར་བླངས་ཏེ།།
ཐོས་འདོད་ཚ་བས་བཙེར་པའི་འགྲོ་བ་ཕལ།།
བློ་ལྡོག་མན་ངག་བཞི་ཡི་ཆུ་ཐིགས་ཀྱིས།།
སྐྱེ་དགུའི་སེམས་ཀྱི་མཐིལ་ཏུ་ནེམ་ཤ་ཕབས།།

 

འཕྲིན་ལས་སྐྱ་རེངས་གསར་པས་ཉེར་དྲངས་པའི།།
གྱེར་བསྟན་ཉི་མ་འབུམ་གྱི་འོད་པོ་ཆེའི།།
འཆད་རྩོད་ཟེར་ཐག་གཡུང་དྲུང་ལུ་གུ་རྒྱུད།།
ཁྱུང་དཀར་བསྟན་པ་རྒྱས་པའི་གླིང་དུ་འཐེན།།
འཕྲུལ་ངག་བོན་གྱི་སྣང་བ་དཀར་པོ་ཡིས།།
སྒང་དྲུག་རི་བོའི་ཁོར་ཡུག་གསལ་བར་བྱས།།

 

དམུ་རྒྱལ་གཤེན་གྱི་མཁྱེན་དཔྱོད་མ་གྲོས་མཚོའི།།
བྱིན་བརླབ་ཟིལ་ཐིགས་གླིང་འདིར་བབས་པ་ཡི།།
སྒོ་བཞི་མཛོད་ལྔའི་བོན་གཞུང་ཆུ་བོའི་ཀླུངས།།
སླར་ཡང་གངས་རིའི་ཞིང་འདིར་བསྐྱིལ་བ་ཡིས།།
མཛད་བཟང་ཁ་འབའ་ཆུ་བོའི་འུར་རྒྱངས་ཀྱིས།།
གངས་རིའི་ཞིང་ཁམས་ཤིག་ཤིག་འགུལ་བར་བྱས།།

 

སུམ་གླང་བྲག་དམར་རི་བོའི་འགྱིང་ཁུག་ཏུ།།
མདོ་སྔགས་བཤད་སྒྲུབ་བསྟན་པའི་ཀ་ཆེན་བསླངས།།
ཁྱུང་དཀར་བསྟན་པ་རྒྱས་པའི་གླིང་ཆེན་གྱི།།
མདོ་སྔགས་རྩོད་གྲྭ་འུར་བའི་གད་རྒྱངས་དེ།།
རི་བོ་སྒང་དྲུག་ཞིང་གི་སྒང་ཟེ་ནས།།
གོ་ལའི་ཕྱོགས་མཐའ་ཀུན་ཏུ་གྲགས་པར་བྱས།།

 

ཁྱེད་ཀྱི་མཛད་འཕྲིན་གངྒའི་ཀླུངས་ཆེན་པོ།།
ཞིབ་ཀྱིས་བརྗོད་ལ་དབྱངས་ཅན་ལྷ་ངལ་བས།།
བདག་བློ་རྒྱ་ཁབ་མིག་གིས་ག་ལ་དཔོགས།།
འོན་ཀྱང་དད་པའི་བློ་ཡིས་བླངས་པ་ཡི།།
ཚིགས་སུ་བསྟར་བའི་ཚོམ་བུ་ཉུང་ངུ་འདི།།
ལྷོ་རོང་ནགས་ཀྱི་འདབས་ནས་དད་པས་བཏེགས།།

 

     དཔོན་གསས་རྩ་བའི་བླ་མ་༧ཚོགས་གཉིས་རྒྱ་མཚོ་ནོར་བུ་རིན་པོ་ཆེའི་སློབ་བུ་ཡོངས་ཀྱི་གྲལ་སྣེ་བ་ཁྱུང་ཐོག་རྒོད་ཀྱིས་ཀླ་གྲུབ་རི་འདབས་ནས་དད་པས་བཏེགས།།

དཔྱད་མཆན།བསྡོམས་པས་དཔྱད་མཆན་ 0 ཡོད།
དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ།།
སྤེལ་མཁན།