འོད་གསལ་ལྷ་ལས་ཆད་ཀྱང་རུང་།།
འཕྲག་དོགས་ལས་ཀྱིས་གྲོལ་ཀྱང་རུང་།།
གོང་ལྟར་མི་བུ་གོ་ཆོད་འདི།།
ཅི་བྱེད་དབང་ཆ་རང་ལག་ཡོད།།

སྔོན་གྱི་སྐལ་པ་དང་པོ་ཞེས།།
དང་པོ་ཡིན་རུང་མ་ཡིན་རུང་།།
བོན་དཔེ་གླེགས་ཧྲུལ་དུ་མ་ནས།།
གསལ་ཀྱང་ཚེ་ལོ་བརྒྱ་པའི་དུས།།

རྣམ་མཁྱེན་སྟོན་པའི་བཀའ་གཞུང་ཞེས།།
མཁས་དབང་ཉི་མས་གསལ་ཁ་བཏོད།།
གཞུང་ལ་སྔ་ཕྱི་བརྟག་པས་ན།།
སྟོང་དང་བརྒྱ་ཡི་བཀའ་འདུག་སྙམ།།

རྟོག་གེ་བ་ལ་ཡིད་ཆེས་ཕྱིར།།
མཚན་གཞི་ཙམ་ཡང་འཇོག་དགོས་ན།།
རམ་རོལ་འབུམ་དང་ཚེ་མདོ་གཟུངས།།
དུས་གསུམ་སྟོན་པའི་བཀའ་གཞུང་ཡིན།།

དེ་ལ་སྒྲོ་སྐུར་མང་མོད་ཀྱང་།།
མགོ་མཇུག་ཚིག་ལ་མི་བརྟག་ནས།།
གཞུང་གི་བབ་ལ་དཔྱད་པས་ན།།
དཔྱད་རིན་ཆོག་པ་འདུག་གོ་སྙམ།།

ཚེ་ལོ་བརྒྱ་དུས་རྩོད་ལྡན་དུས།།
སྟོང་གི་བཀའ་གཞུང་ཐ་དག་ཀུན།།
དུང་ཕྱིས་བཞིན་དུ་འགྲོ་ཟེར་ཡང་།།
ལྷག་པའི་དངོས་པོ་བརྟག་ན་མང་།།

ད་ནི་གོང་ལྟར་ཡིན་ཀྱང་རུང་།།
སེམས་ཅན་ཕན་བདེའི་གཞི་ཡིན་ཕྱིར།།
ཐམས་ཅད་བདེ་བ་འདོད་སྙམ་པར།།
སྙམ་བཞིན་སྟོན་པ་བཀའ་གཞུང་འདི།།

ལྷ་དབང་ལག་གི་ནོར་བུ་དང་།།
ཀླུ་དབང་གཙུག་གི་ནོར་བུ་སྟེ།།
སེམས་ཅན་བདེ་སྐྱིད་བསྐྲུན་ཐབས་གཞུང་།།
འདི་ལྷག་སྲིད་ན་བཙལ་ཀྱང་མིན།།

གྲུབ་མཐའི་ཕྱོགས་ལྷུང་ཟེར་ན་ཆོག།
བན་བོན་ཆགས་སྡང་ཟེར་ན་ཆོག །
གཏམ་དང་མི་ཁ་འུར་བའི་དུས།།
ཡིན་ཡང་བརྟག་ན་ངེས་ཤེས་རྙེད།།

གཡུང་དྲུང་བོན་དང་ཉི་ཟླ་ལ།།
ཆགས་སྡང་ཕྱོགས་རིས་མིང་ཡང་མེད།།
སེམས་ཅན་གྱ་གྱུའི་བློ་མང་བས།།
ཆགས་སྡང་ཕྱོགས་རིས་རྟག་ཏུ་རྩོད།།


བོན་འདི་བཀྲ་གསལ་པད་མ་སྟེ།།
སྒྲོ་སྐུར་འདམས་རྫབ་ཆེས་མང་ཡང་།།
རང་མདངས་མི་འགྱུར་གཡུང་དྲུང་སྟེ།།
སེར་པོ་གསེར་གྱི་ཁ་དོག་བཞིན།།

བོན་འདི་བསྐལ་པའི་མེ་དཔུང་སྟེ།།
ཉེས་སྒྲིབ་ཕྲ་རགས་ཚང་ཚིང་ནགས།།
ཐུལ་གྱིས་འཚིགས་ཤིང་ཡེ་ཤེས་མེ།།
ནུབ་མེད་སྲིད་པའི་མཐའ་རུའང་འབར།།


བོན་འདི་གསོས་ཀྱི་ཆུ་བོ་སྟེ།།
རིགས་དྲུག་སེམས་ཅན་སྐོམ་གདུང་ལ།།
གང་དགོས་བོན་གྱི་ཆུ་སྦྱིན་གྱིས།།
ཉེས་ལྟུང་བཀྲུ་ཞིང་སེམས་ཅན་གསོ།།

བོན་འདི་ཡེ་ཤེས་བདེ་རླུང་སྟེ།།
སྡུག་བསྔལ་དྲག་པོས་གདུང་བའི་འགྲོས།།
སྤྱད་ན་ཞི་བདེའི་དབུགས་འབྱིན་ཞིང་།།
ཐར་པ་བདེ་བའི་སྐམ་སར་འདེགས།།

ཆབ་ནག་སྲིད་པ་རྒྱུད་ཀྱི་སྒོ།།
འཇིག་རྟེན་ཕན་བདེ་བསྐྱེད་པའི་ཕྱིར།།
ཕྱྭ་སྣང་འཕྲུལ་སྲིད་གཞུང་བཞིན་དུ།།
སྤྱད་ན་སྣོད་བཅུད་ཁ་ཡོ་སྙོམས།།

འཕན་ཡུལ་འབུམ་གྱི་བོན་སྒོ་བཞིན།།
དོན་དམ་ཟབ་མོའི་བདེན་པ་དང་།།
ཕྲ་ཞིབ་ཀུན་རྫོབ་དགེ་སྤྱོད་ཀྱིས།།
ཟུང་འབྲེལ་སྤྱོད་པས་འབྲས་བུར་བསྙེགས།།

ཆབ་དཀར་དྲག་པོ་སྔགས་ཀྱི་བོན།།
རིམ་གཉིས་བསྐྱེད་རྫོགས་ཟབ་མོའི་དོན།།
ཚུལ་བཞིན་བསྙེན་སྒྲུབ་ཉམས་བླངས་པས།།
མི་འགྱངས་མི་ལུས་ལྷ་རུ་འགྱུར།།

དཔོན་གསས་མན་ངག་བོན་སྒོ་བཞིན།།
མ་བརྩལ་ལྷུན་གྲུབ་ཡེ་ཉིད་དོན།།
ཡིད་ཆེས་ཐག་ཆོད་དོན་བསྒོམ་ན།།
ཚེ་གཅིག་སྐུ་གསུམ་རྒྱལ་ས་ཟིན།།

སྤྱི་རྒྱུག་མཛོད་ཀྱི་བོན་སྒོའི་དོན།།
མ་རྨོངས་ཝ་ལེར་ཤེས་གྱུར་ན།།
ཕྱི་ནང་སྣོད་བཅུད་འཁོར་འདས་བོན།།
མཁྱེན་པའི་ཡེ་ཤེས་མྱུར་དུ་ཐོབ།།

དེ་ལྟའི་གཡུང་དྲུང་བོན་གྱི་མཛོད།།
ཕ་དང་མེས་པོས་བཞག་པའི་ནོར།།
བུ་ཡིས་ལོངས་སུ་སྤྱོད་ནུས་ན།།
མི་རིང་ཕ་ཤུལ་བུ་ཡིས་ཟིན།།

སེམས་ཅན་གང་ལ་གང་འདུལ་དུ།།
གསུངས་པའི་བོན་སྒོ་སྣ་རེ་ཡིས།།
སེམས་ཅན་སྡུག་བསྔལ་སྣ་རེ་སེལ།།
དེས་ན་ཉམས་སུ་ཅིས་མི་ལེན།།

དེ་ལྟའི་གནད་དོན་ཡོངས་མཐོང་བའི།།
རྩ་བླ་འོད་ཟེར་སྦྱིན་པ་ཡིས།།
ཡོད་རྒུ་བོན་ཕྱོགས་གཏོང་བའི་འབྲས།།
ད་རེས་ཁྱུང་ཡུལ་མཐིལ་དུ་ཤར།།

སྒོ་བཞི་མཛོད་ལྔའི་བོན་སྡེ་འདི།།
སེམས་ཅན་བདེ་སྐྱིད་བསྐྲུན་པའི་ཐབས།།
མི་གཞི་བཟང་པོ་བསྐྲུན་པའི་རྒྱུ།།
ས་བོན་བཟང་སྐྱེད་བོན་འདི་ཡིན།།

མིས་བཟོས་ཁོལ་བུ་ཆུང་བསྐལ་གྱིས།།
བསྣུབས་ཀྱང་བསྣུབས་ཀྱང་དར་བ་འདི།།
བདེན་པ་བོན་གྱི་མཐུ་རྟགས་ཡིན།།
ད་དུང་ཡང་ཡང་དར་བར་ཤོག།

བདེན་པ་བོན་གྱི་ནུས་མཐུ་ཡིས།།
བཟོད་དཀའ་ཐམས་ཅད་འཇོམས་པར་ཤོག།
ཉོན་མོངས་དགྲ་ཚོགས་བརླག་པར་ཤོག།
ཅི་བསམ་ཐམས་ཅད་འགྲུབ་པར་ཤོག།