གཏམ་བཟང་དབྱར་གྱི་མེ་ཏོག 

          ཕུགས་བསམ་དང་རེ་བས་འཚོས་པའི་མི་བུ་མཚན་ཉིད་པ་ཞིག་ཡིན་ན་སྤྱི་ཚོགས་དང་མི་རིགས་ལ་སྨན་པའི་བྱ་གཞག་ཅིག་སྒྲུབ་དགོས་རྒྱུ་ནི་ཁ་ཚ་དགོས་གཏུགས་སུ་སེམས།   འོན་ཀྱང་ནུས་ཆུང་ཕྲན་ལྟ་བུ་ཞིག་ལ་མཚོན་ན་ཤེས་རིག་གི་རྨང་གཞི་ཞན་ཁར་གནའ་དེང་གི་ཤེས་བྱ་གང་ལའང་སྦྱོང་སྟོབས་ཀྱི་ཆ་ཕྲ་ཞིང་སྤྱི་ཚོགས་ཀྱི་འཚོ་བ་དངོས་ལ་ཉམས་མྱོང་མེད་པའི་སྐྱེ་བོ་ཕལ་པ་ཞིག་ཡིན་པས་ཁོ་བའི་ངོས་ཐད་ནས་གླེང་ན་ལག་རྗེས་ཞེས་པ་ནི་ཉིན་སྐར་གྱི་ཟླ་བོའི་ཚོད་དུ་སྣང་།  ཡིན་ཡང་བཤེས་གཉེན་རྣམ་པའི་གསུང་གདམས་ཟབ་མོའི་འོག་ལོ་ཤས་རིང་ཐོས་བསམ་གྱི་བྱ་བར་ཞུགས་པའི་ཉེ་འབྲས་སམ་དཀའ་ཚེགས་ཀྱི་འཕྲང་ལམ་དུ་མ་ཞིག་བརྒྱུད་པའི་འབྲས་རྟགས་སུ་ད་ཐེངས་གཞི་ནས་རྩོམ་དེབ་༼ རེ་སྙེག་གི་མི་ཚེ་ ༽ཞེས་པ་ཞིག་རྣམ་པ་ཚོའི་སྤྱན་ལམ་དུ་བསྟར་ཐུབ་པ་བྱུང་བ་ནི་རང་ཉིད་ཀྱི་ངོས་ཐད་ནས་གླེང་ན་དགའ་འོས་པའི་བྱ་བ་ཞིག་ཏུ་སྙམ་བཞིན་ཡོད། 

           འོན་ཀྱང་གོང་ཞུས་ལྟར་རྩོམ་རིག་གི་ནར་མ་སོན་བའི་ཕྲན་ལ་ཚིག་གི་སྡེབ་སྦྱོར་འཁྲུག་པ་དང་།  དོན་གྱི་གོ་བ་ལོག་པ་སོགས་མདོར་ན་མ་ཤེས་མ་གོ་མ་རིག་པ་གསུམ་གྱི་སྐྱོན་ཆ་ཅི་རིགས་ཤིག་ཡོད་སྲིད་པས་གཟིགས་ཀློག་པ་ཚོས་དགེ་འདོན་སྐྱོན་སེལ་དུ་དམིགས་ཏེ་དགོངས་འཆར་ལྷུག་རྩོལ་ཡོང་བའི་རེ་ཞུ་འབུལ་བཞིན་ཡོད་པ་མ་ཟད།  ལེགས་པའི་ཆ་གང་མཆིས་གངས་ཅན་རིག་མཛོད་ཆེན་མོའི་སྡོང་གྲོགས་སུ་འགྱུར་བའི་རེ་སྨོན་དང་བཅས།   ཞུ་ཚང་སྐལ་བཟང་རྒྱལ་མཚན་ནམ་གངས་ཞུན་དུ་འབོད་པ་དེས་ ༢༠༡༤ ལོའི་ཟླ ༨ ཚེས་ ༡༩ ཉིན། 

 
ཁྱུང་ཡུལ་སྤུ་རྒྱལ་རིག་སློབ་ཁང་ནས་ཕུལ།

འབྲེལ་གཏུགས་ཁ་པར།
1332258322

13989085621