ཉིན་ཟུག་མཚན་ཟུག་གི་འབ་སྒྲ་གཟན་པོས།། རྣ་བའི་གསང་སྦུག་ལ་ཟུག་ངུ་སྟེར་ཞིང་།། ཁོ་ར་ཁོར་ཡུག་གི་ལྷིང་འཇགས་དཀྲོག་པའི།། ཁྱི་རྐུན་འཁྱམས་པོ་འདི་མེད་ས་མི་འདུག།
ཁྱི་ཐོང་རེ་རེ་ཡིས་ཟུག་སྐད་འབྱིན་ཚེ།། ཁྱི་ཡན་འཁྱམས་པོ་རྣམས་སྣང་བ་འུར་ནས།། གཅིག་འགྲོགས་གཉིས་འགྲོགས་ཀྱི་ཨ་གསར་ཚ་བོས།། ལ་རྒྱུག་ལུང་རྒྱུག་གི་སྟོང་འཁྱམས་བརྒྱབ་སོང།།
རྒྱུ་མེད་སྤྲང་པོ་ཡི་སྤྲང་ཉམས་མཐོང་དུས།། གཡས་འཇུ་གཡོན་འཐེན་གྱི་ཁྱི་རུབ་བུང་བུང་།། རྒྱུ་ཡོད་ཕྱུག་པོ་ཡི་ཕྱུག་ཉམས་མཐོང་དུས།། ཁ་ལྡག་སྣ་ལྡག་གི་འདྲིས་ཡོག་ལིང་ལིང་།།
འཚར་ས་ལང་ས་ནི་རྒྱ་གྲོང་སྲང་ལམ།། རྒྱུག་ས་འགྲོ་ས་ནི་རི་ཐང་བར་གསུམ།། སྡོད་ས་ཉལ་ས་ནི་མི་གཙང་གླིང་ཁྲོད།། རེ་ས་ལྟོས་ས་ནི་ཟོས་འཕྲོ་འཐུང་ལྷག།།
ཁྱི་ལུས་བླངས་པ་ནི་འདྲ་འདྲ་ཡིན་ཡང་།། ཁྱི་ལྟོ་ཁམ་གང་གི་གསོལ་རས་དཀོན་ལ།། ཁྱི་རྔ་སྒོ་བཙིར་གྱི་བརྙས་བཅོས་མང་བའི།། ཁྱི་རྐུན་འཁྱམས་པོ་ནི་ཁྱི་ཡི་ཐ་མ།།
རྒྱ་སྒོ་དོད་ཚད་ཀྱི་སྒོ་འགྲམ་ཉུལ་ནས།། རུས་དུམ་ཆུང་ཆུང་གི་ཐོབ་ཤོར་ཆེད་དུ།། ཞེ་སེམས་འགྲས་འགྲས་ལ་ཁྱི་འཛིང་གཏུག་བཞིན།། འཕྲོག་རེས་རྨུག་རེས་ཀྱིས་འཚོ་བ་སྐྱེལ་དགོས།།
ཡོས་བུ་ཟླ་ངོ་རུ་བརྩེ་བའི་ཤེ་སྦྱོར།། ལུག་གི་ཟླ་བ་ལ་ཁྱི་མ་ཚང་རོ།། བྲང་འོག་ཁྱི་ཕྲུག་གིས་ལུས་ཟུངས་བཞིབས་རྗེས།། ཉམ་ཐག་ནུས་ཟད་ཀྱི་ཀེང་རུས་གཟུགས་བརྙན།།
གར་གླང་འབྲོང་གཡག་ལས་གཏུམ་དྲག་ཆེ་བའི།། རྩལ་ཆེན་སེང་གེ་ཡི་ཚ་བོར་གྲཊ་ཀྱང་།། ཁ་ལྕེ་སུ་ཚ་ཡིས་སྐད་སྡིགས་བྱེད་ས།། ལག་རྩལ་སུ་ཆེ་ཡིས་རྡོ་རྡུང་བྱེད་ས།།
སྡེར་མོ་ཟད་ཟད་བར་ལ་ལུང་འགྲིམས་ཤིང་།། འགྲམ་རུས་འཐོར་འཐོར་ལ་རུས་གོང་མུར་ནས།། ཉིན་མཚན་ལྟོས་མེད་དུ་འབ་ཟུག་བྱས་ཀྱང་།། ཡ་ལན་སྟེར་མཁན་ནི་སུ་ཞིག་མེད་དོ།།
བགྲེས་པོའི་འབེལ་གཏམ་དེབ་ཕྲེང་བཅུ་བཞི་པ་ལས་དྲངས།
|