མི་མཐུན་སྤྱང་དང་ལུག་གུ།

ལྷན་གཅིག་འཚོ་བ་རོལ་ཡང༎

བཙན་པོ་ཉམས་ཆུང་ཐུག་པས༎

དོན་མེད་སྐྱོ་རོགས་ཡིན་འགྲོ།

བསླུ་ཉོ་བསླུ་བྲིད་བརྩེ་བར༎

ཡིད་ཆེས་འདུན་པ་བཅངས་ཡང༎

ཡིད་ལྟོས་མེད་པར་བརྩེ་བས༎

དོན་མེད་སྐྱོ་རོགས་ཡིན་འགྲོ།

མི་ཚེ་རིན་ཐང་དཀོན་པོ༎

དཀོན་པའི་དོན་གཉེར་མེད་ན༎

མི་ཡུལ་ལན་གཅིག་འགྲིམ་པ༎

དོན་མེད་སྐྱོ་རོགས་ཡིན་འགྲོ།

རིག་གནས་བརྩོན་པ་ཆེ་ཡང༎

མི་རིགས་རང་གི་རིགས་གནས༎

སྦྱང་འདོད་སེམས་ལ་མེད་ན༎

དོན་མེད་སྐྱོ་རོགས་ཡིན་འགྲོ།

ཕ་མ་བླ་མ་ཡིན་ཡང༎

མ་རུང་ཞེ་ངན་བུ་ཡིས༎

གཡོ་དང་ཁྲམ་ལ་འདེགས་ན༎

དོན་མེད་སྐྱོ་རོགས་ཡིན་འགྲོ།

ཁྲིམས་ཐོག་དཔོན་པོ་ཡིན་ཡང༎

ཁྲིམས་དྲང་ལྟ་བ་དོར་ནས༎

ལག་དམར་ཟུངས་འབྲེལ་བྱས་ན༎

དོན་མེད་སྐྱོ་རོགས་ཡིན་འགྲོ།

དགེ་རྒན་མཚན་མཆོག་ཆེ་ཡང༎

སློབ་མའི་བདེ་སྡུག་མི་བལྟ༎

ཉི་མ་འཁྱོལ་ཙམ་བྱས་ན༎

དོན་མེད་སྐྱོ་རོགས་ཡིན་འགྲོ།

རྒྱ་གྲོང་འགྲིམ་པའི་བུ་ལོ༎

མི་ཚེ་འཁྱོལ་ཙམ་བྱས་ནས༎

འཁྱམ་པོའི་གོ་ས་འཛིན་ན༎

དོན་མེད་སྐྱོ་རོགས་ཡིན་འགྲོ།

ལང་ཚོ་དར་བབས་བུ་མོ༎

གནས་ལ་འགྲོ་སྔ་བྱེད་ནས༎

ཕ་མའི་དྲིན་ལན་མ་སོད༎

དོན་མེད་སྐྱོ་རོགས་ཡིན་འགྲོ།

ན་གཞོན་བུ་དང་བུ་མོ༎

བརྩེ་བའི་འདམ་ལ་མ་འཁོར༎

རིག་མེད་གླེན་པ་འགྱུར་ན༎

དོན་མེད་སྐྱོ་རོགས་ཡིན་འགྲོ།

དྲིན་ཆེན་ཕ་མ་རྣམ་པ༎

ཤོ་བག་རྒྱན་ལ་མ་གཡེང༎

བཟའ་མི་སྤྲང་པོ་འགྱུར་ན༎

དོན་མེད་སྐྱོ་རོགས་ཡིན་འགྲོ།

འགྲོ་མགོན་བླ་མ་རྣམ་པ༎

སྒོར་མོ་ནོར་ལ་མ་གཡེང༎

སངས་རྒྱས་ཁྲིམས་ལས་འགལ་ན༎

དོན་མེད་སྐྱོ་རོགས་ཡིན་འགྲོ།

༢༠༡༤/༠༦/༡༢ ཉིན་ལྷ་ལྡན་ཉི་མའི་གྲོང་ནས་བྲིས།