| སྙད་འདོགས་འོག་གི་ཆོས་ལུགས། |
| [རྩོམ་ཁུངས།：ཁྱུང་པོའི་དྲ་བ།] [ཟླ་ཚེས།：2014-04-03] [རྩོམ་པ་པོ།：སུམ་པའི་མེ་གཤོག] [ཀློག་གྲངས།：] |
|
ཤེལ་གྱི་གངས་རི་དང་གཡུ་ཡི་མཚོ་མོ།། ཡངས་པའི་རྩྭ་ཐང་དང་མཛེས་པའི་སྤང་ལྗང་།། དྭངས་མའི་མཁའ་རླུང་དང་དག་པའི་ཆུ་བོ།། གཙང་མའི་ཁོར་ཡུག་ཅིག་འདི་ན་ཆགས་སོ།།
རྐུ་རྫུན་གཡོ་ཁྲམ་ལ་རྒྱབ་ཀྱིས་ཕྱོགས་ཤིང་།། དད་དང་དམ་གཙང་གིས་དགེ་ལ་ཡིད་གཏད།། བྱམས་བརྩེའི་གཤིས་བཟང་ཞིག་རྒྱུད་ལ་འཇག་པའི།། ཞི་བདེའི་མི་རིགས་ཤིག་འདི་ནས་གྲོལ་ལོ།།
དེ་ནི་མཐོ་སྒང་གི་གངས་རིའི་ཞིང་ཁམས།། དེ་ནི་འཛམ་གླིང་གི་གོ་ལའི་རྩེ་མོ།། དེ་ནི་མི་རིགས་འདིའི་མེས་པོའི་ཕ་ས།། དེ་ནི་ང་རང་གི་དུང་བརྩེ་ལུས་ས།།
འདི་ན་ལོ་རྒྱུས་ཀྱི་གསང་བ་འཐུག་ཅིང་།། འདི་ན་སྔོན་རབས་ཀྱི་རྣམ་ཐར་མང་བས།། འདི་ན་དར་གུད་ཀྱི་འཆི་གསོན་ཐུག་པའི།། གཏམ་རྒྱུད་དུ་མ་ཡི་བྱུང་བ་ལོས་ཡོད།།
ཚེ་སྲོག་དམར་དམར་ལ་འཕྲད་པའི་བར་ཆོད།། ཁ་བའི་བུ་ཡུག་བཞིན་འཚུབ་པའི་ཁྲོད་ནས།། མི་ལོ་ཁྲི་ཕྲག་ཏུ་བགྲེས་ནས་ཡོད་པའི།། ཆོས་ལུགས་རྙིང་པ་ཞིག་འདི་ན་དར་རོ།།
དེ་ནི་རང་རིགས་ལ་སྔ་ས་ཞིག་ནས།། རང་སོ་རང་ཕེར་གྱི་རིག་གཞུང་ཡོད་ཅེས།། གཟི་བརྗིད་འཛམ་གླིང་ལ་ངོམ་རིན་ཡོད་པའི།། མེས་པོའི་ཆོས་ལུགས་ཏེ་གཡུང་དྲུང་བོན་ནོ།།
ཁྱེད་ཀྱི་ལོ་རྒྱུས་དངོས་ངག་ནས་གླེང་ན།། འཇིག་རྟེན་སྐྱིད་སྡུག་གི་ལོ་ཟླའི་ཁྲོད་ནས།། ལང་ཚོ་བཙན་རྒས་ཀྱི་བགྲེས་སོང་ཞིག་གི། གཟུགས་བརྙན་དག་མ་ཞིག་ཡིད་ལ་འཆར་འོང་།།
རང་གི་མགོ་ཁུངས་དེ་གཞན་ལས་འཚོལ་ནས།། གཞན་གྱི་བརྒྱུད་པ་ཞིག་འཛིན་དགོས་མེད་པར།། ས་སྐྱེས་རྡོ་སྐྱེས་སུ་འདི་ནས་བྱུང་བས།། ཁྱེད་ཀྱི་རིགས་རུས་ནི་ལྷ་ལས་གཙང་བ།།
རྗེས་འཇུག་རིམ་བྱོན་གྱིས་ཉམས་སུ་བླངས་དུས།། ཕུང་པོ་ལྷག་མེད་ཀྱི་འཇའ་ལུས་འོད་སྐུར།། གཅིག་ནས་གཅིག་རྒྱུད་དུ་ནམ་མཁར་དེང་སོང་།། ཁྱེད་ཀྱི་གྲུབ་རྟགས་དེ་ཅི་འདྲའི་མཚར་བ།།
སྒོ་བཞི་མཛོད་ལྔ་ཡི་བོན་སྒོ་རྒྱ་ཆེ།། ཐེག་པ་རིམ་དགུ་ཡི་གྲུབ་མཐའ་གཏིང་རིང་།། ཕྱི་ནང་གསང་གསུམ་གྱི་འདུལ་ཐབས་གྲངས་མང་།། བརྒྱད་ཁྲི་བཞི་སྟོང་གི་གཉེན་པོ་དཔུང་འཐུག།
བསྐལ་པ་ཡ་ཐོག་གི་དུས་སྐབས་ཤིག་ན།། རྒྱལ་ཁམས་རྒྱལ་ཁྲིམས་ཀུན་ཁྱེད་ཀྱིས་དབང་བྱས།། སྙིགས་མ་མར་འགྲིབ་ཀྱི་དུས་ཤིག་ཚེས་དུས།། ཇི་ལྟར་དཔུང་མེད་དུ་གྱུར་ནས་ལྷག་སོང་།།
གནམ་གྱི་ཁྲི་བདུན་ལ་དབུ་ནས་ཟུག་པའི།། འོད་ཀྱི་དམུ་ཐག་དེ་ཁྱེད་ཀྱི་ཡིན་དུས།། སུ་ཡི་བསླུ་བྲིད་ཀྱི་རལ་ཁ་རྣོན་པོས།། དགོས་པ་མེད་པ་རུ་འབྲེག་ཐབས་བྱས་སོང་།།
གཤེན་གླུ་ཐེངས་གསུམ་རེ་མ་བླངས་བར་དུ།། བཙན་པོས་བཀའ་མཆིད་ཀྱང་སྒྲོག་ས་མེད་པའི།། ཁྱེད་ལ་དབང་བ་ཡི་ཐོབ་ཐང་དེ་ལ།། སུ་ཡིས་དོན་མེད་དུ་འཕྲག་དོག་ཟོས་སོང་།།
རྒྱལ་ཁམས་ཆོས་སྲིད་ཀྱིས་ཞི་བདེར་གནས་དུས།། བློན་པོ་བློ་ངན་ཚོའི་ཕྲ་མས་དབྱེན་བཅུག། བཙན་པོའི་སྙིང་ཁམས་ལ་བདུད་སེམས་ཞུགས་ནས།། སུ་ཞིག་ཉེས་མེད་དུ་རྒྱང་ཕུད་བཏང་སོང་།།
སུ་ཞིག་དབེན་གནས་སུ་གཤེགས་དགོས་བྱུང་སོང་།། གང་དག་ཟབ་གཏེར་དུ་སྦས་དགོས་བྱུང་སོང་།། སུ་ཞིག་རི་གསེང་ན་འཚོ་དགོས་བྱུང་སོང་།། ཅི་ཞིག་ལྷ་སྲུང་ལ་བཅོལ་དགོས་བྱུང་སོང་།།
གང་ཞིག་རྡུལ་ཕྲན་གྱི་ཀློང་ལ་ཐིམ་སོང་།། གང་ཞིག་བར་ཆོད་འོག་ཞིག་ཧྲུལ་གྱུར་སོང་།། སུ་ཡི་ལོ་རྒྱུས་ཀྱི་ཡིག་ཚང་འཐོར་སོང་།། སུ་ཡི་ལས་དབང་ལ་གཏོར་བརླག་ཐེབ་སོང་།།
བརྡོལ་འཁྱལ་བསྒྱུར་གསུམ་གྱི་ཐ་སྙད་མོད་པོ།། སུ་ཡིས་དོན་མེད་དུ་ཉན་དགོས་བྱུང་སོང་།། མུ་སྟེགས་ལོག་ཆོས་སོགས་སྒྲོ་བཀུར་སྣ་ཚོགས།། སུ་ཡིས་མིང་ཆད་དུ་འཁུར་དགོས་བྱུང་སོང་།།
བདེན་པའི་ལོ་རྒྱུས་ཀྱི་ཕུགས་མེད་ཟེར་ནས།། སུ་ཡིས་ཁྱེད་ཉིད་ལ་མཐོང་ཆུང་བྱས་སོང་།། ཁུངས་མེད་ལོ་རྒྱུས་ཀྱི་རྫུན་གཏམ་མང་པོས།། སུ་ཡིས་ཁྱེད་ཉིད་ལ་སྨ་འབེབ་བྱས་སོང་།།
ཁ་ལག་འདྲེས་སོང་ན་ངན་འགྲོར་ལྟུང་ཞེས།། སུ་ཞིག་ཁྱེད་ཉིད་དང་ཁ་ཕྲལ་གཏོང་སོང་།། སངས་རྒྱས་སྒྲུབ་བྱེད་ཀྱི་གདམ་ངག་མེད་ཅེས།། སུ་ཞིག་ལོག་ལྟ་ཡི་དབང་དུ་བསྒྱུར་སོང་།།
སུ་ཡི་དད་མོས་ལ་གཏོར་བཤིག་བཟོས་སོང་།། སུ་ཡི་སེམས་ངོས་སུ་རྨ་ཁ་གཏོད་སོང་།། སུ་ཡི་སྤྱི་ཚོགས་ལ་ཟིང་འཁྲུག་བཟོས་སོང་།། སུ་ཡི་འཆམས་མཐུན་ལ་འགོག་རྐྱེན་བཟོས་སོང་།།
རང་གི་མེས་པོ་ཚོས་བཞག་པའི་ཕ་ནོར།། རང་གི་རིག་གཞུང་དེ་ཉམས་ཆག་འགྲོ་དུས།། རང་གི་སྲོག་ལས་ཀྱང་གཅེས་པར་བྱས་ནས།། སུ་ཡིས་ད་བར་དུ་རྒྱུན་འཁྱོང་བྱས་སོང་།།
ལོ་རྒྱུས་གཙང་དག་ཅིག་ཁྱེད་ལ་ལྡན་ཡང་།། སུ་ཞིག་དྲང་བདེན་གྱི་བློ་མིག་ལྡོང་སོང་།། བདེན་པ་ལུང་རིགས་ཀྱིས་ཁྱེད་ཕྱོགས་བྱེད་ཀྱང་།། སུ་ཡིས་ཁ་ཤེད་ཀྱིས་རྫུན་རེད་ཟེར་སོང་།།
སྐྱིད་ལ་ཚོད་མེད་དུས་ཐམས་ཅད་དབང་བྱས།། སྡུག་ལ་ཚོད་མེད་པར་ཀུན་གྱི་བརྙས་ཁུར།། སྐྱིད་སྡུག་འཚོ་བ་ཡི་གཅོང་རོང་བར་ནས།། སུ་ཡིས་ད་བར་དུ་སྡུག་རུས་ཁྱོག་སོང་།།
སངས་རྒྱས་ཆོས་ལུགས་ཀྱི་དོན་སྙིང་ངོ་མ།། འཚེ་མེད་ཞི་བདེ་ཡི་ལྟ་གྲུབ་ཡིན་ཡང་།། སུ་ཡིས་ཆབ་སྲིད་ཀྱི་ལག་ཆ་བྱས་སོང་།། སུ་ཡིས་འཁྲུག་རྩོད་ཀྱི་རྐྱེན་དུ་ཁྱེར་སོང་།།
སྲིད་ཀྱི་ཁེ་དབང་ལ་ཐེ་གཏོགས་མ་བྱས།། རང་ནུས་ཅི་ལྕོགས་ཀྱིས་དམངས་ཕན་བསྒྲུབས་ཏེ།། དཀར་པོ་དགེ་བ་ཡི་ངང་རྒྱུན་བསྲིངས་ནས།། སུ་ཞིག་ངེས་དོན་གྱི་ཞི་བདེར་གནས་སོང་།།
ཁ་བའི་ལས་དབང་གི་དར་གུད་རླུང་རེད།། བསམ་ན་དེ་དག་ཀུན་སུ་ཡིས་ལན་སོང་།། སུ་ཞིག་ད་དུང་ཡང་ཕྱོགས་ཞེན་ཁོ་ནས།། ཁྱེད་ཀྱི་གྲུབ་མཐའ་ལ་སྨོད་བཞིན་བསྡད་འདུག།
__ཆོས་ལུགས་ཀྱི་ཕྱོགས་ཞེན་ཁོ་ན་ཁོག་ལ་བཟུང་ནས་གཡུང་དྲུང་བོན་ལ་སྒྲོ་སྐུར་སྣ་ཚོགས་ཀྱི་སྨོད་པ་ཡིག་ངག་ཅི་རིག་གི་ཐོག་ནས་ཁ་སང་དེ་རིང་མང་དུ་མཐོང་ཐོས་བྱུང་བར། ད་སྐབས་མི་རིགས་མཐུན་འབྲེལ་དང་སྤྱི་ཚོགས་འཆམ་མཐུན་བཅས་ལ་ཁ་ཕྱོགས་ཏེ། བསམ་མནོ་གུ་ཡངས་ཀྱི་སློབ་གསོ་དར་སྤེལ་གཏོང་བཞིན་པའི་དུས་རབས་འདིར། ད་དུང་ཡང་ཁུངས་མེད་པའི་བཤད་སྒྲོས་ཙམ་ལ་ཡིད་གཏད་ནས། ཕན་ལས་གནོད་ཆེ་བའི་ཚིག་འཁྱལ་གང་བྱུང་དུ་སྨྲ་བཞིན་པའི་གུ་དོག་གི་མི་བུ་འདི་འདྲ་འགའ་ལྷག་འདུག་ཨང་སྙམ་སྟེ་འདི་ཉིད་བྲིས་པའོ།། |
