ཀུན་འདུས་རིན་ཆེན་རྩ་རྒྱུད་ཀྱི་གཞུང་བཞུགས་པ་ལེགས་སོ། |
[རྩོམ་ཁུངས།:ཁྱུང་པོའི་དྲ་བ།] [ཟླ་ཚེས།:2014-01-06] [རྩོམ་པ་པོ།:སྟོན་པ་ཀུན་ཏུ་བཟང་པོ།] [ཀློག་གྲངས།:] |
སྟོན་པ་ཀུན་ཏུ་བཟང་པོ་ཡིས། རྣམ་རྟོག་དྲྭ་བ་བཅོམ་མཛད་ཅིང༌། ཟབ་ཅིང་རྒྱ་ཆེའི་སྐུ་མངའ་བ། ཐམས་ཅད་མཁྱེན་ལ་ཕྱག་འཚལ་ལོ། སྟོན་པའི་ཐུགས་ཀྱི་དཀྱིལ་འཁོར་ནས། བྱིན་གྱིས་རླབས་ཀྱིན་བཤད་པ་ཡི། ཀུན་འདུས་རིན་ཆེན་རྩ་བའི་རྒྱུད། འོག་མིན་དབྱིངས་ཀྱི་ཕོ་བྲང་དུ། སྔོན་སྦྱངས་འཕྲོ་ལེན་འཁོར་རྣམས་ལ། ངོ་བོ་ཉིད་ཀྱི་བཀའ་སྩལ་པ། དད་པ་ཆེ་ལ་ཡིད་གཞུང་ཞིང༌། སེར་སྣ་ཆུང་ལ་ཆགས་པ་མེད། སྟོབས་ཆེ་བློ་དང་ལྡན་པ་ལ། རྒྱུད་འགྲེལ་རྩ་བའི་མན་ངག་བསྟན། དད་པ་ཆེ་ལ་ཡིད་གཞུང་ཞིང༌། འགྱུར་ལྡོག་མེད་པའི་བློ་ཅན་ལ། མདོ་དང་རྩ་བར་དྲིལ་ལ་བསྟན། ཐ་སྙད་ཚིག་བོར་དོན་ལ་ཞུགས། མི་ཡེངས་བརྟན་པའི་བློ་ཅན་ལ། ༑ མན་ངག་དོན་སྟོན་ནན་ཏན་བསྲེ། སྤྱིར་ན་གསང་སྔགས་ལུགས་ཀྱིས་ཀྱང༌། གཞི་དང་ལམ་དང་འབྲས་བུ་གསུམ། རྒྱུད་དང་ལུང་དང་མན་ངག་གསུམ། དཔེ་དང་དོན་དང་རྟགས་དང་གསུམ། ཕྱི་དང་ནང་དང་གསང་བ་གསུམ། བསྐྱེད་པ་རྫོགས་པ་རྫོགས་ཆེན་གསུམ། བསྙེན་པ་སྒྲུབ་པ་ལས་ཁ་གསུམ། འདི་རྣམས་སྒོ་ནས་གཏན་ལ་དབབ། གཞི་དང་ལམ་དང་འབྲས་བུ་གསུམ། ཡུལ་དང་གནས་དང་ཕྱིན་པ་འདྲ། རྒྱུད་དང་ལུང་དང་མན་ངག་གསུམ། རྗེ་དང་བློན་པོ་རྨང་མི་འདྲ། དཔེ་དང་དོན་དང་རྟགས་དང་གསུམ། མེ་ལོང་བྱད་དང་གཟུགས་བརྙན་འདྲ། ཕྱི་དང་ནང་དང་གསང་བ་གསུམ། མཛོད་དང་བང་མཛོད་ཡང་དབེན་འདྲ། བསྐྱེད་པ་རྫོགས་པ་རྫོགས་ཆེན་གསུམ། སྐྲས་ཀྱི་རིམ་པའི་གདང་བུ་འདྲ། བསྙེན་པ་སྒྲུབ་པ་ལས་ཁ་གསུམ། དཔའ་བོ་གོ་དང་མཚོན་ཆ་འདྲ། དེས་ན་མཆོག་ཏུ་གཅེས་པར་གསུང༌། དང་པོ་གཞི་ལ་དྲུག་ཡོད་དེ། དམ་ཚིག་དབང་དང་ཏིང་འཛིན་དང༌། འཕྲིན་ལས་ལྟ་བ་སྤྱོད་པའོ། གསང་སྔགས་ཀུན་གྱི་གཞི་མ་ནི། དམ་ཚིག་དག་གིས་བཟུང་བ་ལ། ངོ་བོ་ངེས་ཚིག་དབྱེ་བ་དང༌། གང་ཟག་ཡུལ་དང་བསྲུང་ཐབས་དང༌། སྐྱོན་ཡོན་མཐུན་པའི་དཔེ་ཡིས་བསྟན། རིམ་པ་དབང་གིས་བསྒྲོད་པ་ལ། ངོ་བོ་ངེས་ཚིག་དབྱེ་བ་དང༌། ཕྱི་དང་ནང་དང་གསང་བ་དང༌། ཤེས་རབ་ཡེ་ཤེས་མཐར་ཐུག་གི གནས་དང་དུས་དང་སློབ་དཔོན་དང༌། སློབ་མ་གླེང་གཞི་དཀྱིལ་འཁོར་དང༌། འཇུག་དང་བསྐུར་དང་རྣམ་གྲངས་དང༌། གནས་དང་བསྐུར་དང་སྒྲིབ་བྱང་ཚད། ས་ནོན་རྟགས་བརྡ་དེ་འབྲེལ་དང༌། རྫས་དང་དགོས་དོན་ནུས་པའི་ཚད། མཐུན་པའི་དཔེ་དང་འབྲས་བུ་ཡིས། དབང་གི་མན་ངག་མཆོག་ཏུ་བསྟན། ཉམས་སུ་ཏིང་འཛིན་བླངས་པ་ལ། སྤྱི་ཁོག་རྩིས་འགོ་དམིགས་དབྱེ་སྟེ། སྤྱི་ཁོག་སྣང་གཤེན་འཕྲུལ་གཤེན་དང༌། དགེ་བསྙེན་དྲང་སྲོང་ཨ་དཀར་དང༌། ཡེ་གཤེན་ལྷུན་གྲུབ་ཆེན་པོ་བདུན། རྩིས་འགོ་ཡུལ་དང་སློབ་དཔོན་དང༌། ཕྱོགས་དང་དོན་ཆེད་དགོས་པ་ལྔ༌། དམིགས་ནི་གཞི་དང་མ་ཡངས་དང༌། སྔགས་དང་ཕྱག་རྒྱ་ཡིག་འབྲུ་ལྔའོ། དོན་ཀུན་འཕྲིན་ལས་བསྡུ་བ་དང༌། ངོ་བོ་ངེས་ཚིག་དབྱེ་བ་དང༌། དགོས་པའི་འབྲས་བུ་བསྟན་པ་ལྔ༌། སྡུག་བསྔལ་སྐྱོབ་པའི་འཕྲིན་ལས་དང༌། འོག་མ་རང་འཐད་འཕྲིན་ལས་དང༌། རྩལ་མེད་ལྷུན་གྲུབ་འཕྲིན་ལས་དང༌། ཨ་དཀར་བ་ཡི་འཕྲིན་ལས་ལ། ཞི་རྒྱས་དབང་དྲག་མངོན་སྤྱོད་ལྔ༌། གང་བྱེད་གཙོར་བླང་མ་འདྲེས་པ། དཔེར་ན་གསེར་གྱི་སྐུད་པ་ལ། རིན་ཆེན་ཕྲེང་བ་བརྒྱུས་པ་ལྟར། དོན་ཀུན་འཕྲིན་ལས་ཉིད་ལ་བསྡུ། སྤྱི་སོ་ལྟ་བས་ཐག་བཅད་ལ། ངོ་བོ་ངེས་ཚིག་དབྱེ་བ་དང༌། དགོས་པ་འབྲས་བུ་ལྔ་ཡིས་བསྟན། ཉན་བསྒོམ་གནས་བསམ་ལྟ་བ་དང༌། བསམ་འདས་བརྗོད་མེད་ལྟ་བ་དང༌། བྱ་བརྩལ་རྒྱུ་བྲལ་ལྟ་བ་དང༌། དམིགས་པ་ཡུལ་བྲལ་ལྟ་བ་དང༌། མཉམ་པ་ལྷུན་གྲུབ་ལྟ་བ་དང༌། རྟོགས་ཤིང་ཁོང་དུ་ཆུད་པ་ཡིས། རྨ་བྱས་མདངས་ལ་བལྟ་བ་བཞིན། རང་གིས་རང་ལ་བལྟ་བར་བྱ། ལ་རྣམས་སྤྱོད་པས་དོར་བ་ལ། ངོ་བོ་ངེས་ཚིག་དབྱེ་བ་དང༌། བྱིན་གྱིས་བརླབས་ཀྱི་སྤྱོད་པ་དང༌། གསོ་དང་སྦྱོང་བའི་སྤྱོད་པ་དང༌། བརྟུལ་ཞུགས་སྤྱོད་པ་ལས་སོགས་ཀྱིས། ཉམ་ང་མེད་པར་བྱ་བ་སྟེ། གླང་ཆེན་ཆུ་རུ་ཞུགས་པ་བཞིན། ཅིས་ཀྱང་བསྒྱུར་དུ་མེད་པའོ།། བར་དུ་ལམ་ལ་ལྔ་རུ་བསྟན། ཕྱག་རྒྱ་ལྷུན་གྲུབ་སར་བགྲོད་ན། དབང་དང་དམ་ཚིག་གཙོ་རུ་བླང༌། དང་པོ་དབང་གི་ལམ་ཡིན་ཏེ། དབང་མ་ནོས་པར་ལས་རྩོམ་དང༌། སྒྱིད་ལྗིད་མ་བརྟགས་པར་ཁལ་འགེལ་བ། འཁོར་ལོ་སྲོག་ཤིང་ཆག་པ་འདྲ། དེ་ཕྱིར་དབང་གི་ལམ་མཆོག་གཅེས། ཀུན་གཞི་བྱང་ཆུབ་སེམས་ཉིད་ལ། བག་ཆགས་དགེ་བའི་ཚོགས་བསགས་ནས། བླ་མེད་ས་ལ་གོམས་བྱའི་ཕྱིར། གཉིས་པ་ཚོགས་ཀྱི་ལམ་མཆོག་གཅེས། བདེར་གཤེགས་ཐུགས་དམ་བསྐང་བ་དང༌། ལན་ཆགས་བུ་ལོན་སྦྱང་བའི་ཕྱིར། གསུམ་པ་གཏོར་མའི་ལམ་མཆོག་གཅེས། ལུས་ངག་ཡིད་གསུམ་ཕྱག་རྒྱ་ཡིས། དབྱེར་མེད་ས་ལ་བགྲོད་པའི་ཕྱིར། བཞི་པ་ཕྱག་རྒྱའི་ལམ་མཆོག་གཅེས། ཐུགས་ཉིད་ཡེ་ཤེས་ཕྱག་རྒྱ་ཡིས། ལོག་པར་ལྟ་བའི་གགས་བསལ་ནས། ཟབ་མོའི་བོན་ཉིད་ཉམས་བླང་ཕྱིར། ལྔ་པ་ཏིང་འཛིན་ལམ་མཆོག་གཅེས། ཐ་མ་གྲུབ་པའི་འབྲས་བུ་ནི། སྐུ་ལྔ་ལྷུན་གྲུབ་འབྲས་བུ་དང༌། ཡང་དག་ལྷུན་རྫོགས་འབྲས་བུ་དང༌། རིག་འཛིན་གྲུབ་པའི་འབྲས་བུའོ།། རྒྱུད་ནི་སྙན་ཁུངས་བརྒྱུད་པ་དང༌། མང་ཚང་འབྲེལ་འཁྲུགས་དོན་རྣམས་ཚང། ཕུན་སུམ་ཚོགས་ཕྱིར་རྒྱུད་ཅེས་བྱ། རྒྱུད་འདི་རྒྱུད་ཀྱི་རྒྱལ་པོ་སྟེ། ཕྱི་རྒྱུད་དྲྭ་བའི་དམིགས་ལྟར་བཤད། ནང་རྒྱུད་རིན་ཆེན་ཕྲེང་ལྟར་བཤད། གསང་རྒྱུད་རྒྱ་མཚོའི་ཀློང་ལྟར་བཤད། ལུང་ནི་ཞལ་ནས་གསུང་ཕྱིར་ལུང༌། དྲང་དོན་ངེས་དོན་བརྒྱུད་པའི་ལུང༌། ལུང་འདི་ལུང་གི་བླ་མ་སྟེ། བརྒྱུད་པ་ལུང་གི་རྒྱལ་པོར་བཤད། མན་ངག་ཐུགས་ལ་གདམ་པ་སྟེ། སྙན་ཁུངས་རྒྱུད་དང་ས་ཐོབ་དང༌། གོ་སླ་ཚིག་ཆུང་དོན་དཔག་མེད། དེ་ཕྱིར་མན་ངག་ཡང་སྙིང་སྟེ། ཇི་ལྟར་རྣམ་པ་མཁྱེན་པས་གསུངས། རྒྱུད་དང་ལུང་དང་མན་ངག་གསུམ། གཅིག་ལ་གཅིག་བརྟེན་གཅིག་གི་ངང༌། དཔེ་ནི་འདི་ལྟར་སྣང་བ་ཡི། འཇིག་རྟེན་མཐུན་པའི་དཔེ་ལ་བཙལ། དོན་ནི་བོན་ཉིད་དབྱིངས་སུ་བསྟན། གཞི་མཐུན་པ་ལ་དམ་དུ་བཅའ། རྟགས་ནི་རང་གི་སེམས་ལ་བསྡུ། སྐྱེ་མེད་འགྱུར་མེད་དབྱིངས་སུ་གྲོལ། ཕྱི་ནི་སྣང་བ་མ་འགག་པ། ནང་ནི་ཕུང་པོ་ལྷ་རུ་གྲུབ། གསང་བ་བྱང་ཆུབ་སེམས་སུ་དག། བསྐྱེད་པའི་རིམ་པ་བསྟན་པ་ཡང༌། ཕྱི་དང་ནང་དང་གསང་བའོ།། འགྲེལ་ལས། གསང་བ་གསུམ། ཀ ཕྱི་ལྟར་བསྐྱེད་པ་གསུམ་ཡིན་ཏེ། དད་པ་ཅན་གྱི་ཚོགས་བསྐྱེད་དང༌། བྱང་ཆུབ་མཆོག་ཏུ་སེམས་བསྐྱེད་དང༌། མཁན་སློབ་སྲས་དང་སློབ་མར་བསྐྱེད། ནང་ལྟར་བསྐྱེད་པ་ལ་ཡང་གསུམ། ཕྱི་ནི་སྣོད་ཀྱི་འཇིག་རྟེན་འདི། གཞལ་ཡས་ཁང་དུ་བསྐྱེད་པ་དང༌། ནང་ནི་བཅུད་ཀྱི་འཇིག་རྟེན་༵འགྲེལ་ལས། སེམས་ཅན ཀ རྣམས། ལྷ་དང་ལྷ་མོར་བསྐྱེད་པ་དང༌། བདག་ཉིད་དམ་ཚིག་སེམས་དཔའ་ཡི། དཀྱིལ་འཁོར་ཉིད་དུ་བསྐྱེད་པའོ།། གསང་བ་ལྟར་དུ་བསྐྱེད་པ་ནི། ཕུང་པོ་ཁམས་དང་སྐྱེ་མཆེད་རྣམས། ལྷ་དང་ལྷ་མོར་བསྐྱེད་པ་དང༌། རྩ་མདུད་ཕོ་བྲང་ཐིག་ལེ་ལ། བདེ་བ་ཆེན་པོར་བསྐྱེད་པ་དང༌། དངས་མ་ཡེ་ཤེས་བསྐྱེད་པའོ།། རྫོགས་པའི་རིམ་པ་ལ་གསུམ་སྟེ། ཕྱི་རྫོགས་ནང་རྫོགས་གསང་རྫོགས་སོ།། དེ་ལ་ཕྱི་ཡི་རྫོགས་ལུགས་གསུམ། ཕོ་ཉ་ཡང་སྤྲུལ་ལྷ་ཚོགས་རྣམས། སྒོ་བ་ཡབ་ཡུམ་ངང་དུ་རྫོགས། སྒོ་བ་སྲུང་མ་རྣམས་ལ་རྫོགས། སྲུང་མ་ཕྱོགས་མཚམས་ཁྲོ་བོར་རྫོགས། ཕྱོགས་མཚམས་དབུས་ཀྱི་གཙོ་ལ་རྫོགས། གཙོ་བོ་དམིགས་མེད་ངང་ལ་རྫོགས། དེ་རྣམས་ཉམས་སུ་བླང་དུས་སུ། ཕྱི་ནང་རྟགས་གཉིས་འབྱུང་བ་སྟེ། ཕྱི་རྟགས་ལོག་རྟོག་སྒྱུ་མར་ཤེས། ནང་རྟགས་ཡེ་ཤེས་ངོས་བཟུང་བྲལ། ནང་ལྟར་རྫོགས་པ་ལ་གསུམ་ཏེ། མཚན་མའི་ལྷ་སྐུ་འོད་ལ་རྫོགས། འོད་ནི་ཐིག་ལེའི་ངང་དུ་རྫོགས། ཐིག་ལེ་བྱང་ཆུབ་སེམས་ལ་རྫོགས། གསང་བ་ལྟར་དུ་རྫོགས་པ་ལྔ། ཡེ་ཤེས་ངོས་འཛིན་མན་ངག་གིས། སྨན་པ་མཁས་པའི་ཚུལ་དུ་རྫོགས། དུག་ལྔ་རང་གྲོལ་མན་ངག་གིས། ལྷ་ལུས་བདུད་རྩིས་ཁྱབ་ལྟར་རྫོགས། རང་རིག་རང་གསལ་མན་ངག་གིས། ཉི་མ་ཤར་བ་ལྟ་བུར་རྫོགས། ཡེ་ཤེས་མྱུ་གུའི་མན་ངག་གིས། པད་མ་ཁ་ཕྱེ་ལྟ་བུར་རྫོགས། ཉམས་མྱོང་རིག་པའི་མན་ངག་གིས། དིག་མའི་རྨི་ལམ་ལྟ་བུར་རྫོགས། རྫོགས་པ་ཆེན་པོའི་རྫོགས་ལུགས་གསུམ། མངོན་པ་ཕྱི་ཡི་སྣང་བ་རྣམས། སྤྲོས་བྲལ་ནམ་མཁའི་ངང་དུ་རྫོགས། རྣམ་པར་རྟོག་པའི་བྱུང་ཚོར་རྣམས། ཀུན་གཞི་དག་པའི་ངང་དུ་རྫོགས། རིག་པའི་ཡེ་ཤེས་རྩལ་རྣམས་ནི། རྣམ་པ་ཐམས་ཅད་མཁྱེན་པ་ཡི། ཡེ་ཤེས་ལ་ནི་རྫོགས་པའོ། ཡེ་ཤེས་ཐིག་ལེ་ཉག་གཅིག་ལ། མ་ལུས་པར་ནི་རྫོགས་པའོ།། དཔེ་ཡི་ཐིག་ལེ་ཡེ་ཤེས་འདུས་མ་བྱས། དོན་གྱི་ཐིག་ལེ་མཚན་མ་མྱ་ངན་འདས། རྟགས་ཀྱི་ཐིག་ལེ་མི་འགྱུར་དབྱིངས་ན་གནས། མན་ངག་ཐིག་ལེ་སྟོང་ལ་རྒྱ་མ་ཆད། སེམས་ཉིད་ཐིག་ལེ་ཡེ་ཤེས་འདུས་མ་བྱས། ་ དེ་ལྟ་བུ་ཡི་ངང་དུ་ཐམས་ཅད་རྫོགས། བསྙེན་པ་སྒྲུབ་པ་ལས་ཁ་ནི། བསྙེན་པའི་རང་བཞིན་དུས་དང་གྲངས། མཚན་མ་རྟགས་ཀྱི་བསྙེན་པ་ཡི། སྔོན་དུ་འགྲོ་བའི་རིམ་པའོ།། སྒྲུབ་པ་ལུས་ངག་ཡིད་གསུམ་གྱིས། སྐུ་གསུང་ཐུགས་སུ་བསྒྲུབ་པའོ།། ལས་ཁ་འཕྲིན་ལས་རྣམ་བཞི་ལ། ཇི་ལྟར་མཐུན་པའི་བསྒྲུབ་བ་གདགས། མདོར་ན་ཕྱི་ནང་གསང་བའི་བོན། རང་གི་རིག་པའི་ཡེ་ཤེས་ཡིན། མདོ་དོན་རྩ་བར་དྲིལ་བ་ཡི། ཀུན་འདུས་རིན་ཆེན་རྩ་རྒྱུད་འདི། མ་འོངས་འཁོར་ལ་གདམས་པའི་མདོ། རིན་པོ་ཆེ་རྩ་རྒྱུད་ཀུན་འདུས་ཀྱི་རྒྱུད་ཆེན་པོ། བྱིན་གྱིས་བརླབས་ཀྱིས་བཤད་པའོ།། རྫོགས་སོ།། ཚིག་ཚོགས་ཉུང་ལ་བརྗོད་བྱ་རྒྱས། གསང་སྔགས་ཀུན་ལ་རབ་གཅེས་པའི། དོན་རྣམས་མ་ལུས་འདི་རུ་ཚང་། དེ་ཕྱིར་རྩ་བ་ཀུན་འདུས་པའི། རིན་ཆེན་ལྟ་བུའི་རྩ་རྒྱུད་འདི། ལས་དབང་ལྡན་པའི་གྲོལ་བ་པ། ཤེས་རབ་དཔལ་གྱིས་བཤད་ཅིང་བཀྲོལ། རྗེས་འཇུག་རྣམས་ཀྱང་ཡིད་ཆེས་མཛོད། ཨུ་ཡོའ་ཨག་ཐམ།
|