ཆབ་དཀར་སྔགས་ཀྱི་བོན་སྒོ། གཙོ་ངོས།གཙོ་ངོས།བོན་སྒོཆབ་དཀར་སྔགས་ཀྱི་བོན་སྒོ།
ཀུན་འདུས་རིན་ཆེན་རྩ་རྒྱུད་ཀྱི་གཞུང་བཞུགས་པ་ལེགས་སོ།
[རྩོམ་ཁུངས།:ཁྱུང་པོའི་དྲ་བ།]   [ཟླ་ཚེས།:2014-01-06]  [རྩོམ་པ་པོ།:སྟོན་པ་ཀུན་ཏུ་བཟང་པོ།]  [ཀློག་གྲངས།:]

      སྟོན་པ་ཀུན་ཏུ་བཟང་པོ་ཡིས།   རྣམ་རྟོག་དྲྭ་བ་བཅོམ་མཛད་ཅིང༌།   ཟབ་ཅིང་རྒྱ་ཆེའི་སྐུ་མངའ་བ།   ཐམས་ཅད་མཁྱེན་ལ་ཕྱག་འཚལ་ལོ།   སྟོན་པའི་ཐུགས་ཀྱི་དཀྱིལ་འཁོར་ནས།   བྱིན་གྱིས་རླབས་ཀྱིན་བཤད་པ་ཡི།   ཀུན་འདུས་རིན་ཆེན་རྩ་བའི་རྒྱུད།   འོག་མིན་དབྱིངས་ཀྱི་ཕོ་བྲང་དུ།   སྔོན་སྦྱངས་འཕྲོ་ལེན་འཁོར་རྣམས་ལ།   ངོ་བོ་ཉིད་ཀྱི་བཀའ་སྩལ་པ།   དད་པ་ཆེ་ལ་ཡིད་གཞུང་ཞིང༌།  སེར་སྣ་ཆུང་ལ་ཆགས་པ་མེད།   སྟོབས་ཆེ་བློ་དང་ལྡན་པ་ལ།   རྒྱུད་འགྲེལ་རྩ་བའི་མན་ངག་བསྟན།   དད་པ་ཆེ་ལ་ཡིད་གཞུང་ཞིང༌།   འགྱུར་ལྡོག་མེད་པའི་བློ་ཅན་ལ།   མདོ་དང་རྩ་བར་དྲིལ་ལ་བསྟན།   ཐ་སྙད་ཚིག་བོར་དོན་ལ་ཞུགས།   མི་ཡེངས་བརྟན་པའི་བློ་ཅན་ལ། ༑   མན་ངག་དོན་སྟོན་ནན་ཏན་བསྲེ།   སྤྱིར་ན་གསང་སྔགས་ལུགས་ཀྱིས་ཀྱང༌།   གཞི་དང་ལམ་དང་འབྲས་བུ་གསུམ།   རྒྱུད་དང་ལུང་དང་མན་ངག་གསུམ།   དཔེ་དང་དོན་དང་རྟགས་དང་གསུམ།   ཕྱི་དང་ནང་དང་གསང་བ་གསུམ།   བསྐྱེད་པ་རྫོགས་པ་རྫོགས་ཆེན་གསུམ།   བསྙེན་པ་སྒྲུབ་པ་ལས་ཁ་གསུམ།   འདི་རྣམས་སྒོ་ནས་གཏན་ལ་དབབ།  གཞི་དང་ལམ་དང་འབྲས་བུ་གསུམ།   ཡུལ་དང་གནས་དང་ཕྱིན་པ་འདྲ།   རྒྱུད་དང་ལུང་དང་མན་ངག་གསུམ།   རྗེ་དང་བློན་པོ་རྨང་མི་འདྲ།   དཔེ་དང་དོན་དང་རྟགས་དང་གསུམ།   མེ་ལོང་བྱད་དང་གཟུགས་བརྙན་འདྲ།   ཕྱི་དང་ནང་དང་གསང་བ་གསུམ།   མཛོད་དང་བང་མཛོད་ཡང་དབེན་འདྲ།   བསྐྱེད་པ་རྫོགས་པ་རྫོགས་ཆེན་གསུམ།   སྐྲས་ཀྱི་རིམ་པའི་གདང་བུ་འདྲ།   བསྙེན་པ་སྒྲུབ་པ་ལས་ཁ་གསུམ།   དཔའ་བོ་གོ་དང་མཚོན་ཆ་འདྲ།   དེས་ན་མཆོག་ཏུ་གཅེས་པར་གསུང༌།   དང་པོ་གཞི་ལ་དྲུག་ཡོད་དེ།   དམ་ཚིག་དབང་དང་ཏིང་འཛིན་དང༌།   འཕྲིན་ལས་ལྟ་བ་སྤྱོད་པའོ།   གསང་སྔགས་ཀུན་གྱི་གཞི་མ་ནི།   དམ་ཚིག་དག་གིས་བཟུང་བ་ལ།   ངོ་བོ་ངེས་ཚིག་དབྱེ་བ་དང༌།   གང་ཟག་ཡུལ་དང་བསྲུང་ཐབས་དང༌།   སྐྱོན་ཡོན་མཐུན་པའི་དཔེ་ཡིས་བསྟན།   རིམ་པ་དབང་གིས་བསྒྲོད་པ་ལ།   ངོ་བོ་ངེས་ཚིག་དབྱེ་བ་དང༌།   ཕྱི་དང་ནང་དང་གསང་བ་དང༌།   ཤེས་རབ་ཡེ་ཤེས་མཐར་ཐུག་གི   གནས་དང་དུས་དང་སློབ་དཔོན་དང༌།   སློབ་མ་གླེང་གཞི་དཀྱིལ་འཁོར་དང༌།   འཇུག་དང་བསྐུར་དང་རྣམ་གྲངས་དང༌།   གནས་དང་བསྐུར་དང་སྒྲིབ་བྱང་ཚད།   ས་ནོན་རྟགས་བརྡ་དེ་འབྲེལ་དང༌།   རྫས་དང་དགོས་དོན་ནུས་པའི་ཚད།   མཐུན་པའི་དཔེ་དང་འབྲས་བུ་ཡིས།   དབང་གི་མན་ངག་མཆོག་ཏུ་བསྟན།   ཉམས་སུ་ཏིང་འཛིན་བླངས་པ་ལ།   སྤྱི་ཁོག་རྩིས་འགོ་དམིགས་དབྱེ་སྟེ།   སྤྱི་ཁོག་སྣང་གཤེན་འཕྲུལ་གཤེན་དང༌།   དགེ་བསྙེན་དྲང་སྲོང་ཨ་དཀར་དང༌།   ཡེ་གཤེན་ལྷུན་གྲུབ་ཆེན་པོ་བདུན།   རྩིས་འགོ་ཡུལ་དང་སློབ་དཔོན་དང༌།   ཕྱོགས་དང་དོན་ཆེད་དགོས་པ་ལྔ༌།   དམིགས་ནི་གཞི་དང་མ་ཡངས་དང༌།   སྔགས་དང་ཕྱག་རྒྱ་ཡིག་འབྲུ་ལྔའོ།   དོན་ཀུན་འཕྲིན་ལས་བསྡུ་བ་དང༌།   ངོ་བོ་ངེས་ཚིག་དབྱེ་བ་དང༌།   དགོས་པའི་འབྲས་བུ་བསྟན་པ་ལྔ༌།   སྡུག་བསྔལ་སྐྱོབ་པའི་འཕྲིན་ལས་དང༌།   འོག་མ་རང་འཐད་འཕྲིན་ལས་དང༌།   རྩལ་མེད་ལྷུན་གྲུབ་འཕྲིན་ལས་དང༌།   ཨ་དཀར་བ་ཡི་འཕྲིན་ལས་ལ།   ཞི་རྒྱས་དབང་དྲག་མངོན་སྤྱོད་ལྔ༌།   གང་བྱེད་གཙོར་བླང་མ་འདྲེས་པ།  དཔེར་ན་གསེར་གྱི་སྐུད་པ་ལ།   རིན་ཆེན་ཕྲེང་བ་བརྒྱུས་པ་ལྟར།   དོན་ཀུན་འཕྲིན་ལས་ཉིད་ལ་བསྡུ།   སྤྱི་སོ་ལྟ་བས་ཐག་བཅད་ལ།   ངོ་བོ་ངེས་ཚིག་དབྱེ་བ་དང༌།   དགོས་པ་འབྲས་བུ་ལྔ་ཡིས་བསྟན།  ཉན་བསྒོམ་གནས་བསམ་ལྟ་བ་དང༌།   བསམ་འདས་བརྗོད་མེད་ལྟ་བ་དང༌།   བྱ་བརྩལ་རྒྱུ་བྲལ་ལྟ་བ་དང༌།   དམིགས་པ་ཡུལ་བྲལ་ལྟ་བ་དང༌།   མཉམ་པ་ལྷུན་གྲུབ་ལྟ་བ་དང༌།   རྟོགས་ཤིང་ཁོང་དུ་ཆུད་པ་ཡིས།  རྨ་བྱས་མདངས་ལ་བལྟ་བ་བཞིན།  རང་གིས་རང་ལ་བལྟ་བར་བྱ།   ལ་རྣམས་སྤྱོད་པས་དོར་བ་ལ།   ངོ་བོ་ངེས་ཚིག་དབྱེ་བ་དང༌།   བྱིན་གྱིས་བརླབས་ཀྱི་སྤྱོད་པ་དང༌།   གསོ་དང་སྦྱོང་བའི་སྤྱོད་པ་དང༌།   བརྟུལ་ཞུགས་སྤྱོད་པ་ལས་སོགས་ཀྱིས།   ཉམ་ང་མེད་པར་བྱ་བ་སྟེ།   གླང་ཆེན་ཆུ་རུ་ཞུགས་པ་བཞིན།   ཅིས་ཀྱང་བསྒྱུར་དུ་མེད་པའོ།།   བར་དུ་ལམ་ལ་ལྔ་རུ་བསྟན།   ཕྱག་རྒྱ་ལྷུན་གྲུབ་སར་བགྲོད་ན།  དབང་དང་དམ་ཚིག་གཙོ་རུ་བླང༌།  དང་པོ་དབང་གི་ལམ་ཡིན་ཏེ།   དབང་མ་ནོས་པར་ལས་རྩོམ་དང༌།   སྒྱིད་ལྗིད་མ་བརྟགས་པར་ཁལ་འགེལ་བ།   འཁོར་ལོ་སྲོག་ཤིང་ཆག་པ་འདྲ།   དེ་ཕྱིར་དབང་གི་ལམ་མཆོག་གཅེས།   ཀུན་གཞི་བྱང་ཆུབ་སེམས་ཉིད་ལ།   བག་ཆགས་དགེ་བའི་ཚོགས་བསགས་ནས།   བླ་མེད་ས་ལ་གོམས་བྱའི་ཕྱིར།   གཉིས་པ་ཚོགས་ཀྱི་ལམ་མཆོག་གཅེས།   བདེར་གཤེགས་ཐུགས་དམ་བསྐང་བ་དང༌།   ལན་ཆགས་བུ་ལོན་སྦྱང་བའི་ཕྱིར།  གསུམ་པ་གཏོར་མའི་ལམ་མཆོག་གཅེས།   ལུས་ངག་ཡིད་གསུམ་ཕྱག་རྒྱ་ཡིས།   དབྱེར་མེད་ས་ལ་བགྲོད་པའི་ཕྱིར།   བཞི་པ་ཕྱག་རྒྱའི་ལམ་མཆོག་གཅེས།  ཐུགས་ཉིད་ཡེ་ཤེས་ཕྱག་རྒྱ་ཡིས།   ལོག་པར་ལྟ་བའི་གགས་བསལ་ནས།   ཟབ་མོའི་བོན་ཉིད་ཉམས་བླང་ཕྱིར།   ལྔ་པ་ཏིང་འཛིན་ལམ་མཆོག་གཅེས།   ཐ་མ་གྲུབ་པའི་འབྲས་བུ་ནི།   སྐུ་ལྔ་ལྷུན་གྲུབ་འབྲས་བུ་དང༌།   ཡང་དག་ལྷུན་རྫོགས་འབྲས་བུ་དང༌།   རིག་འཛིན་གྲུབ་པའི་འབྲས་བུའོ།།   རྒྱུད་ནི་སྙན་ཁུངས་བརྒྱུད་པ་དང༌།   མང་ཚང་འབྲེལ་འཁྲུགས་དོན་རྣམས་ཚང།   ཕུན་སུམ་ཚོགས་ཕྱིར་རྒྱུད་ཅེས་བྱ།   རྒྱུད་འདི་རྒྱུད་ཀྱི་རྒྱལ་པོ་སྟེ།   ཕྱི་རྒྱུད་དྲྭ་བའི་དམིགས་ལྟར་བཤད།   ནང་རྒྱུད་རིན་ཆེན་ཕྲེང་ལྟར་བཤད།   གསང་རྒྱུད་རྒྱ་མཚོའི་ཀློང་ལྟར་བཤད།   ལུང་ནི་ཞལ་ནས་གསུང་ཕྱིར་ལུང༌།   དྲང་དོན་ངེས་དོན་བརྒྱུད་པའི་ལུང༌།   ལུང་འདི་ལུང་གི་བླ་མ་སྟེ།   བརྒྱུད་པ་ལུང་གི་རྒྱལ་པོར་བཤད།   མན་ངག་ཐུགས་ལ་གདམ་པ་སྟེ།   སྙན་ཁུངས་རྒྱུད་དང་ས་ཐོབ་དང༌།   གོ་སླ་ཚིག་ཆུང་དོན་དཔག་མེད།   དེ་ཕྱིར་མན་ངག་ཡང་སྙིང་སྟེ།   ཇི་ལྟར་རྣམ་པ་མཁྱེན་པས་གསུངས།   རྒྱུད་དང་ལུང་དང་མན་ངག་གསུམ།   གཅིག་ལ་གཅིག་བརྟེན་གཅིག་གི་ངང༌།   དཔེ་ནི་འདི་ལྟར་སྣང་བ་ཡི།   འཇིག་རྟེན་མཐུན་པའི་དཔེ་ལ་བཙལ།   དོན་ནི་བོན་ཉིད་དབྱིངས་སུ་བསྟན།   གཞི་མཐུན་པ་ལ་དམ་དུ་བཅའ།   རྟགས་ནི་རང་གི་སེམས་ལ་བསྡུ།   སྐྱེ་མེད་འགྱུར་མེད་དབྱིངས་སུ་གྲོལ།   ཕྱི་ནི་སྣང་བ་མ་འགག་པ།   ནང་ནི་ཕུང་པོ་ལྷ་རུ་གྲུབ།   གསང་བ་བྱང་ཆུབ་སེམས་སུ་དག།   བསྐྱེད་པའི་རིམ་པ་བསྟན་པ་ཡང༌།   ཕྱི་དང་ནང་དང་གསང་བའོ།།  འགྲེལ་ལས།   གསང་བ་གསུམ།  ཀ  ཕྱི་ལྟར་བསྐྱེད་པ་གསུམ་ཡིན་ཏེ།   དད་པ་ཅན་གྱི་ཚོགས་བསྐྱེད་དང༌།   བྱང་ཆུབ་མཆོག་ཏུ་སེམས་བསྐྱེད་དང༌།   མཁན་སློབ་སྲས་དང་སློབ་མར་བསྐྱེད།   ནང་ལྟར་བསྐྱེད་པ་ལ་ཡང་གསུམ།   ཕྱི་ནི་སྣོད་ཀྱི་འཇིག་རྟེན་འདི།   གཞལ་ཡས་ཁང་དུ་བསྐྱེད་པ་དང༌།   ནང་ནི་བཅུད་ཀྱི་འཇིག་རྟེན་༵འགྲེལ་ལས།   སེམས་ཅན  རྣམས།   ལྷ་དང་ལྷ་མོར་བསྐྱེད་པ་དང༌།   བདག་ཉིད་དམ་ཚིག་སེམས་དཔའ་ཡི།   དཀྱིལ་འཁོར་ཉིད་དུ་བསྐྱེད་པའོ།།   གསང་བ་ལྟར་དུ་བསྐྱེད་པ་ནི།   ཕུང་པོ་ཁམས་དང་སྐྱེ་མཆེད་རྣམས།   ལྷ་དང་ལྷ་མོར་བསྐྱེད་པ་དང༌།   རྩ་མདུད་ཕོ་བྲང་ཐིག་ལེ་ལ།   བདེ་བ་ཆེན་པོར་བསྐྱེད་པ་དང༌།   དངས་མ་ཡེ་ཤེས་བསྐྱེད་པའོ།།   རྫོགས་པའི་རིམ་པ་ལ་གསུམ་སྟེ།   ཕྱི་རྫོགས་ནང་རྫོགས་གསང་རྫོགས་སོ།།   དེ་ལ་ཕྱི་ཡི་རྫོགས་ལུགས་གསུམ།   ཕོ་ཉ་ཡང་སྤྲུལ་ལྷ་ཚོགས་རྣམས།   སྒོ་བ་ཡབ་ཡུམ་ངང་དུ་རྫོགས།   སྒོ་བ་སྲུང་མ་རྣམས་ལ་རྫོགས།   སྲུང་མ་ཕྱོགས་མཚམས་ཁྲོ་བོར་རྫོགས།   ཕྱོགས་མཚམས་དབུས་ཀྱི་གཙོ་ལ་རྫོགས།   གཙོ་བོ་དམིགས་མེད་ངང་ལ་རྫོགས།   དེ་རྣམས་ཉམས་སུ་བླང་དུས་སུ།   ཕྱི་ནང་རྟགས་གཉིས་འབྱུང་བ་སྟེ།   ཕྱི་རྟགས་ལོག་རྟོག་སྒྱུ་མར་ཤེས།   ནང་རྟགས་ཡེ་ཤེས་ངོས་བཟུང་བྲལ།   ནང་ལྟར་རྫོགས་པ་ལ་གསུམ་ཏེ།   མཚན་མའི་ལྷ་སྐུ་འོད་ལ་རྫོགས།   འོད་ནི་ཐིག་ལེའི་ངང་དུ་རྫོགས།   ཐིག་ལེ་བྱང་ཆུབ་སེམས་ལ་རྫོགས།   གསང་བ་ལྟར་དུ་རྫོགས་པ་ལྔ།   ཡེ་ཤེས་ངོས་འཛིན་མན་ངག་གིས།   སྨན་པ་མཁས་པའི་ཚུལ་དུ་རྫོགས།   དུག་ལྔ་རང་གྲོལ་མན་ངག་གིས།   ལྷ་ལུས་བདུད་རྩིས་ཁྱབ་ལྟར་རྫོགས།   རང་རིག་རང་གསལ་མན་ངག་གིས།   ཉི་མ་ཤར་བ་ལྟ་བུར་རྫོགས།   ཡེ་ཤེས་མྱུ་གུའི་མན་ངག་གིས།   པད་མ་ཁ་ཕྱེ་ལྟ་བུར་རྫོགས།   ཉམས་མྱོང་རིག་པའི་མན་ངག་གིས།   དིག་མའི་རྨི་ལམ་ལྟ་བུར་རྫོགས།   རྫོགས་པ་ཆེན་པོའི་རྫོགས་ལུགས་གསུམ།   མངོན་པ་ཕྱི་ཡི་སྣང་བ་རྣམས།   སྤྲོས་བྲལ་ནམ་མཁའི་ངང་དུ་རྫོགས།   རྣམ་པར་རྟོག་པའི་བྱུང་ཚོར་རྣམས།   ཀུན་གཞི་དག་པའི་ངང་དུ་རྫོགས།   རིག་པའི་ཡེ་ཤེས་རྩལ་རྣམས་ནི།   རྣམ་པ་ཐམས་ཅད་མཁྱེན་པ་ཡི།   ཡེ་ཤེས་ལ་ནི་རྫོགས་པའོ།   ཡེ་ཤེས་ཐིག་ལེ་ཉག་གཅིག་ལ།   མ་ལུས་པར་ནི་རྫོགས་པའོ།།   དཔེ་ཡི་ཐིག་ལེ་ཡེ་ཤེས་འདུས་མ་བྱས།   དོན་གྱི་ཐིག་ལེ་མཚན་མ་མྱ་ངན་འདས།   རྟགས་ཀྱི་ཐིག་ལེ་མི་འགྱུར་དབྱིངས་ན་གནས།   མན་ངག་ཐིག་ལེ་སྟོང་ལ་རྒྱ་མ་ཆད།   སེམས་ཉིད་ཐིག་ལེ་ཡེ་ཤེས་འདུས་མ་བྱས།  ་ དེ་ལྟ་བུ་ཡི་ངང་དུ་ཐམས་ཅད་རྫོགས།   བསྙེན་པ་སྒྲུབ་པ་ལས་ཁ་ནི།   བསྙེན་པའི་རང་བཞིན་དུས་དང་གྲངས།   མཚན་མ་རྟགས་ཀྱི་བསྙེན་པ་ཡི།   སྔོན་དུ་འགྲོ་བའི་རིམ་པའོ།།   སྒྲུབ་པ་ལུས་ངག་ཡིད་གསུམ་གྱིས།   སྐུ་གསུང་ཐུགས་སུ་བསྒྲུབ་པའོ།།  ལས་ཁ་འཕྲིན་ལས་རྣམ་བཞི་ལ།   ཇི་ལྟར་མཐུན་པའི་བསྒྲུབ་བ་གདགས།   མདོར་ན་ཕྱི་ནང་གསང་བའི་བོན།   རང་གི་རིག་པའི་ཡེ་ཤེས་ཡིན།   མདོ་དོན་རྩ་བར་དྲིལ་བ་ཡི།   ཀུན་འདུས་རིན་ཆེན་རྩ་རྒྱུད་འདི།   མ་འོངས་འཁོར་ལ་གདམས་པའི་མདོ།   རིན་པོ་ཆེ་རྩ་རྒྱུད་ཀུན་འདུས་ཀྱི་རྒྱུད་ཆེན་པོ།   བྱིན་གྱིས་བརླབས་ཀྱིས་བཤད་པའོ།།   རྫོགས་སོ།།  ཚིག་ཚོགས་ཉུང་ལ་བརྗོད་བྱ་རྒྱས།   གསང་སྔགས་ཀུན་ལ་རབ་གཅེས་པའི།   དོན་རྣམས་མ་ལུས་འདི་རུ་ཚང་།   དེ་ཕྱིར་རྩ་བ་ཀུན་འདུས་པའི།   རིན་ཆེན་ལྟ་བུའི་རྩ་རྒྱུད་འདི།   ལས་དབང་ལྡན་པའི་གྲོལ་བ་པ།   ཤེས་རབ་དཔལ་གྱིས་བཤད་ཅིང་བཀྲོལ།   རྗེས་འཇུག་རྣམས་ཀྱང་ཡིད་ཆེས་མཛོད།   ཨུ་ཡོའ་ཨག་ཐམ། 


 

 

 

དཔྱད་མཆན།བསྡོམས་པས་དཔྱད་མཆན་ 0 ཡོད།
དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ།།
སྤེལ་མཁན།