༧  ལུས་ཀྱི་མི་དགེའི་ཉེས་སྤྱོད་སྤངས་པས་ཟག་མེད་མཚན་དཔེའི་དཔལ་ཡོན་རྫོགས། །

ངག་གི་མི་དགེའི་ཉེས་སྤྱོད་སྤངས་པས་ཚངས་དབྱངས་དྲུག་ཅུ་སྙན་ཞིང་འཇེབས། །

ཡིད་ཀྱི་མི་དགེའི་ཉེས་སྤྱོད་སྤངས་པས་ཇི་ལྟ་ཇི་སྙེད་ཀུན་མཁྱེན་ཐུགས། །

སྒོ་གསུམ་མི་དགེའི་ཉེས་སྤྱོད་ཀུན་སྤངས་ཁྲི་གཙུག་རྒྱལ་བར་གུས་པས་འདུད། །

                                                         རྣམ་དག་འདུལ་བའི་སྡོམ་རྒྱུད་ཤེལ་དཀར་འཕྲེང་། །                                                  

ལེགས་པར་འཆང་ཞིང་འགྲོ་ལ་ཐུགས་བརྩེ་བ། །

བདེར་གཤེགས་རྣམ་སྤྲུལ་འདུལ་འཛིན་སྐྱེས་མཆོག་རྣམས། །

བདེ་ཆེན་འཁོར་ལོའི་དབུས་སུ་རྟག་ཏུ་བཀོད། །

      འདིར་རྣམ་དག་འདུལ་བ་དང་འབྲེལ་བའི་གཏམ་ཞིག་གླེང་བར་འདོད།  དེ་ཡང་ཕན་བདེ་མ་ལུས་འབྱུང་བའི་གཞི་རྩ།  རྣམ་དག་འདུལ་བའི་བསྟན་པ་རིན་པོ་ཆེ་འདི་ཉིད་གང་ཟག་གཞན་གྱིས་འདོད་དབང་གིས་བཟོས་པ་དང་།  ཕྱིས་འབྱུང་གྲུབ་མཐའ་གཞན་ལས་བཏུས་པ་སོགས་གཏན་ནས་མ་ཡིན་པར།  བྱང་ཆུབ་ཆེན་པོའི་སྐུ་མངོན་པར་བརྙེས་པའི་བདག་ཅག་གི་སྟོན་པ་རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོ་ཀུན་ལས་རྣམ་པར་རྒྱལ་བ་དེ་ཉིད་ཀྱིས་གདུལ་བྱའི་མོས་ཁམས་དང་བསྟུན་ཏེ་གསུངས་པ་ཞིག་ཡིན་པས་ན་བྱུང་ཁུངས་བཙུན་ཞིང་རྣམ་པར་དག་པའོ།  །བསྟན་པ་རྣམ་པར་དག་པ་དེའི་བརྒྱུད་ཚུལ་ནི།  ཁྲི་གཙུག་རྒྱལ་བས་སློབ་དཔོན་མཛད། གཙུག་གཤེན་རྒྱལ་བས་མཁན་པོ་མཛད།  འ་ཞ་གསང་བ་མདོ་བསྡུས་ཀྱིས་དཔང་པོ་དང་།  འབྱུང་བའི་གཤེན་བཞིས་ལོ་ཙྭ་བ་ལ་སོགས་མཛད་པའི་སྤྲུལ་སྐུའི་མཁན་རྒྱུད་དང་།  དེ་ནས་སྟག་གཟིགས་དང་།  ཞང་ཞུང་།  མངའ་རིས།   མདོ་གམ་དབུས་གཙང་གི་མཁན་སློབ་རྣམས་ལས་རིམ་པར་བརྒྱུད་ནས་ད་ལྟ་སྐུ་དངོས་བཞུགས་ངོ་བོ་རྒྱལ་བ་དང་མཉམ་ཞིང་བཀའ་དྲིན་རྒྱལ་བ་ལས་ཀྱང་ལྷག་པའི་སྐྱབས་རྗེ་སྨན་རིའི་མཁན་སློབ་རྣམ་གཉིས་ཀྱི་བར་དུ། སྡོམ་པར་ལྷད་མ་ཞུགས་ཤིང་བྱིན་རླབས་མ་ཡལ་བར་གདུལ་བྱའི་རྒྱུད་སྨིན་ཞིང་གྲོལ་ནུས་པའི་སྡོམ་པ་རིན་པོ་ཆེ་དངོས་སུ་བཞུགས་པའོ།།  སྡོམ་པ་བླང་བའི་ཡུལ་ཚད་དང་ལྡན་པ་ཞིག་དགོས།  དེ་ལའང་གཉིས།  རང་ལས་ཐོབ་པ་དང་གཞན་ལས་ཐོབ་པ་གཉིས།   དང་པོ་རང་ལས་ཐོབ་པ་ནི་བདེན་པ་མཐོང་བ་ཡན་ཆད་དུ་ཡོད་པ་ལས་དེ་མན་ཆད་དུ་སྐྱབས་འགྲོའི་སྡོམ་པ་ཡང་རང་ལས་ཐོབ་པ་མེད་པ་སྔོན་གྱི་མཁས་པས་གསུངས་ཞེས་མཉམ་མེད་བླ་མས་བཞེད་དོ།།   གཉིས་པ་གཞན་ལས་ཐོབ་པ་ནི་བཙུན་པ་དྲང་སྲོང་གི་ཁྲིམས་དང་ལྡན་པ།   སྤྱིར་སྡེ་སྣོད་དང་།    བྱེ་བྲག་འདུལ་བའི་བསླབ་བྱ་ལ་མཁས་ཤིང་གཞན་རྒྱུད་ལ་སྡོམ་པ་བསྐྱེད་ནུས་པ་སྟེ།  སྡོམ་རྒྱུད་མ་ཆད་པ་ཞིག་དགོས་ཞེས་འདུལ་འཛིན་གྱི་སྐྱེས་མཆོག་རྣམས་ཀྱིས་གསུངས། དེ་ནི་བླང་ཡུལ་ཚད་དང་ལྡན་པའོ།  དེ་མིན་ཕམ་པ་ཕོག་པ་དང་སྡོམ་བརྒྱུད་མེད་པ་སོགས་ལས་སྡོམ་པ་བླང་ཡང་ཡུལ་ཚད་དང་མི་ལྡན་པས་སྡོམ་པ་མི་སྐྱེ་ཞེས་སྨྲའོ།   སྡོམ་པ་ལེན་མཁན་གྱི་གང་ཟག་དེའི་ལུས་རྟེན་མི་ཁོམས་པའི་གནས་བརྒྱད་དང་བྲལ་ཞིང་ཕོ་མོ་ངེས་པ་ཅན་ཞིག་དགོས་པ་ལས་མི་ཕོ་མོ་གང་རུང་དུ་མ་ངེས་ན་སྡོམ་རྟེན་དུ་མི་རུང་ངོ།   བསམ་པའི་ཁྱད་པར་ལ།   ཐོག་མར་ཀུན་སློང་རྣམ་པར་དག་པ་གལ་ཆེ་སྟེ།  སེམས་ཅན་ཐམས་ཅད་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པའི་ཆེད་དུ་བདག་གིས་ཚུལ་ཁྲིམས་ཀྱི་བསླབ་པ་དང་དུ་ལེན་པར་བྱའོ་སྙམ་པའི་ཀུན་སློང་དང་།   ཡུལ་དམ་པ་རྣམས་ལ་དད་པ་དང་མོས་པ་གུས་པ་ཡིད་ཆེས་ཀྱི་བསམ་པ་དང་བཅས་པའི་སྒོ་ནས་རབ་ཏུ་བྱུང་དགོས།   བསམ་པ་མ་དག་པ་སྲུང་སེམས་ཡང་དག་མེད་པ།  རྩེད་མོའི་ཚུལ་གྱིས་ཞུ་བ།   སྡོམ་པ་སྲུང་ཐུབ་མི་ཐུབ་ཚོད་ལྟ་བྱེད་པ།  རབ་ཏུ་བྱུང་ན་གཞན་གྱིས་བསྟོད་སྔགས་དང་སྨོན་པ་བྱེད་ཆེད།  སྙན་གྲགས་ཀྱི་ཆེད་དང་།  རྒྱུ་ཟས་ནོར་ལོངས་སྤྱོད་རྒྱས་པའི་ཆེད།  སྒོར་མོ་སོགས་ཐབས།  སོ་ནམ་གྱི་ལས་ཀའི་ངལ་བ་ལས་གཡོལ་ཆེད་ཙམ།  དགྲ་དང་གཅན་གཟན་གྱི་འཇིགས་སྐྱོབ་དང་།  ལེན་སེམས་ཡང་དག་མེད་པར་རང་དང་ལྟ་སྤྱོད་མཐུན་པའི་གྲོགས་པོ་ཞིག་རབ་ཏུ་བྱུང་ན། དེའི་ལད་མོ་བྱས་ཏེ་རབ་ཏུ་བྱུང་བ་རྣམས་ངེས་འབྱུང་གི་སྡོམ་པ་རྣམ་དག་ཏུ་མི་འགྱུར་ཞིང་།   རང་རྒྱུད་ཀྱི་སྡོམ་པ་བརྟན་པོར་གནས་པའང་ཤིན་ཏུ་དཀའ།   གཞན་ཡང་དེང་སོང་ཕྱི་ཡི་དཔལ་འབྱོར་ཇེ་རྒྱས་སུ་ཕྱིན་ཏེ་མི་རྣམས་རྒྱག་པས་ཁེངས།   བསམ་པའི་དཔལ་ཡོན་ཇེ་ཉམས་སུ་སོང་ནས་ཕན་ཚུན་བསམ་ཤེས་དབེན་པ།   སྡིག་ལ་རྔམ་ཞིང་ལས་འབྲས་ལ་བརྩི་བཀུར་མེད་པའི་དུས་འདིར་མི་འདུ་ཁྲོམ་ཚོགས་ནང་དུ་ན་ཆུང་ཁྱོད་དང་ཁྱོད་ཚོ་འདྲ་བ་གྲྭ་པ་དང་ཨ་ནེ་བྱེད་དགོས་ཚུལ་དང་། མ་བྱས་ན་སྙིང་སྟོབས་མེད་པ་སོགས་ཡང་ཡང་ནན་སྐུལ་བྱས་མཐར་འགའ་ཞིག་བླ་མའི་བཀའ་བཅག་མ་ཕོད་པ་དང་།    འགའ་ཞིག་མ་བྱས་ན་ངོ་ཚས་རྐྱེན་ཏེ་ཁྲིམས་བླངས་པ་དང་།    འགའ་ཞིག་བློ་རྣལ་དུ་མ་དབབ་པར་བདེན་ཁ་ཡང་པོས་རབ་ཏུ་བྱུང་བ་སོགས་མང་དག་ཅིག་བྱུང་ཡང་།   ལོ་དང་ཟླ་བ་ཁ་ཤས་སོང་མཚམས་སྡོམ་སེམས་ལྷོད་ཡང་དུ་གཏོང་ནས་ཁྲེལ་དང་ངོ་ཚས་ཉེས་སྐྱོན་སོགས་ལ་མི་འཛེམས་པར།  བསླབ་འཆལ་བྱེད་པ་ཇེ་མང་དུ་འགྲོ་བ་འདི་ལ་བསམ་ན་ཕྱིས་སུ་འདུལ་བའི་བསྟན་པ་རིན་པོ་ཆེ་འདི་ལ་བརྩི་མཐོང་མེད་པར་འགྲོ་བ་དང་མིག་ལྟོས་ངན་པ།   འདུལ་བའི་བསྟན་པ་ཇེ་ཉམས་སུ་འགྲོ་བའི་རྐྱེན་ངན་དུ་མི་འགྱུར་བའི་ངེས་པ་མི་འདུག་སྙམ།  སྤྱིར་དེ་སྔོན་སྡོམ་བླང་ཐམས་ཅད་སྲུང་ཁྲིམས་མཐར་ཕྱིན་ཤ་སྟག་བྱུང་བ་ཡིན་ཞེས་སྨྲ་མི་གཏུབ་ཀྱང་ད་ལྟའི་དུས་དང་བསྟུན་ན་ཆེས་མང་བ་ཡིན་ནོ།།   ཇི་ཡིན་ཞེ་ན།   འདུལ་འཛིན་གྱི་མཁན་སློབ་ཚད་ལྡན་རྣམ་པས་སྡོམ་པར་བར་ཆོད་ཡོད་མེད་ནན་གྱིས་འདྲི་བ་དང་།   གདུལ་བྱའི་མོས་ཁམས་དང་བསྟུན་ཏེ་སྡོམ་པ་གནང་བ་ལས།   མི་ངོ་དང་ནོར་ཕྱིར་རམ་གང་བྱུང་བྱུང་དུ་སྡོམ་པ་མི་འབོག་ཅིང་།   རྣམ་དག་འདུལ་བའི་བསྟན་པ་རིན་པོ་ཆེར་གཙིགས་སུ་འཛིན་པ་དང་།   གཅེས་སྤྲས་ཆེ་བའི་ཡོན་ཏན་ཡིན་ནོ།།  འོ་ན་དགེ་སྐུལ་བླ་མ་རྣམ་པས་འདུལ་བའི་བསླབ་བྱ་ཉམས་སུ་ལེན་དགོས་ཚུལ་དང་གཞན་འདུལ་བའི་སྒོ་རུ་བཅུག་པ་ལ་དགོས་པ་མེད་དམ་ཞེ་ན། བླ་མས་བསྟན་འགྲོའི་དོན་ཆེན་སྒྲུབ་པ་ལ་བསྔགས་བསྟོད་དང་ཡི་རངས་ལས་རང་རྒྱུད་ཀྱི་འཕྲག་དོག་མཁྲིས་ནད་ལྡང་སྟེ་བླ་མའི་ལེགས་བྱས་དཀར་པོ་ལ་ཕྱིན་ཅི་ལོག་ཏུ་བཟུང་ནས་སྒྲོ་སྐུར་དང་།   ཁ་ཅིག་ལྟར་སྡོམ་ལྡན་ཇེ་ཉུང་དུ་གཏོང་བའི་ཀུན་སློང་ངན་པ་སོགས་གཏན་ནས་མིན།   གཙོ་བོ་འདུལ་འཛིན་གྱི་སྐྱེས་མཆོག་རྣམ་པས་སྡོམ་པ་གནང་སྟངས་ཀྱི་ཕྱག་ལེན་མཛད་སྲོལ་ཇི་བཞིན་དང་།   སྒོས་སུ་འདུལ་བའི་ལས་ཆོག་ནང་བཞེད་པ་ལྟར་རང་ལ་འདོད་པ་ཡོད་མེད་དང་བར་ཆོད་ཡོད་མེད་ཚུལ་བཞིན་འདྲི་དགོས་པ་དེ་ལ་དངོས་གནས་རྒྱུ་མཚན་ཆེན་པོ་ཞིག་འདུག་བསམ་གྱི་ཡོད།   གཞན་དད་འདུན་གྱི་བརླན་དང་བྲལ་ཞིང་།   མོས་འདུན་གྱི་རྟེན་གཞི་སྟོང་བའི་བྱ་མང་འགྱུར་ཡང་ཅན་རྣམས་ལ།  སྡོམ་པའི་ས་བོན་ཇི་ལྟར་གཏབ་ཀྱང་དགེ་འབྲས་རྩ་བ་མི་ཚུགས་པས་ཕན་པ་ལས་གནོད་ཚབས་ཆེའོ།།  སྡོམ་པ་ལེན་ཚུལ་དང་བླང་བྱའི་སྡོམ་པ་འདུལ་བའི་སྤྱོད་ལམ་སོགས།    མཁས་པའི་དབང་པོ༧་མེ་སྟོན་ཤེས་རབ་འོད་ཟེར་གྱིས་མཛད་པའི་འདུལ་བ་མདོར་བསྡུས་དང་ཀུན་བཏུས།   དེའི་འགྲེལ་བ་༧རྒྱལ་བ་གཉིས་པ་མཉམ་མེད་ཤེས་རབ་རྒྱལ་མཚན་གྱིས་མཛད་པའི་འདུལ་འགྲེལ་རྒྱས་བསྡུས།   ༧ཀུན་མཁྱེན་ཉི་མའི་རྣམ་དག་འདུལ་བའི་རྣམ་བཤད་ནོར་བུའི་འཕྲེང་བ་སོགས་སུ་རང་རེ་འབྲེལ་ཡོད་རབ་བྱུང་བ་རྣམས་ཀྱིས་ཡང་ཡང་དུ་གཟིགས་རྟོགས་དགོས་པ་འཚལ།     དེ་ལྟར་སྒོ་གསུམ་དཀའ་ཐུབ་ལ་གནས་ཤིང་ཚངས་སྤྱོད་འདི་ཉིད་ངལ་བ་དོན་མེད་ཀྱི་སྤྱོད་པ་ལྷུར་བླང་པ་མ་ཡིན་ཏེ།   འབྲས་བུ་ཕུན་སུམ་ཚོགས་པ།    གནས་སྐབས་སུ་ཚེ་རིང་ནད་མེད་བར་ཆོད་རྐྱེན་གྱིས་མི་ཚུགས་པ་དང་།   བསོད་ནམས་རྒྱས་པ།   སྐྱེ་འགྲོ་ཀུན་གྱིས་བཀུར་བའི་གནས་སུ་གྱུར་པ།   དཀར་ཕྱོགས་ཀྱི་ལྷ་རྣམས་ཀྱིས་སྡོང་གྲོགས་མཛད་ཅིང་སྙན་པའི་གྲགས་པ་ཀུན་ཏུ་ཁྱབ་པར་འགྱུར་རོ།  ། མཐར་ཡང་ཚུལ་ཁྲིམས་རྣམ་པར་དག་པ་ལ་བརྟེན་ནས་ཏིང་འཛིན་གྱི་བསླབ་པ་འབྱུང་ཞིང་།   ཏིང་འཛིན་གྱི་བསླབ་པ་ལ་བརྟེན་ནས་རྣམ་འབྱེད་ཀྱི་ཤེས་རབ་འབྱུང་།   རྣམ་འབྱེད་ཀྱི་ཤེས་རབ་ཀྱིས་དོན་གཉིས་ལྷུན་གྱིས་འགྲུབ་པར་འགྱུར་རོ།།

རྣམ་འདྲེན་བླ་མའི་བརྩེ་བས་རྗེས་བཞག་ཚུལ་ཁྲིམས་བསླབ་པ་འདོམས་པའི་གཞུང་། །

རྣམ་ཀུན་མི་འབྲལ་ཡང་ཡང་འགྲོགས་དང་རྣམ་དཀར་དགེ་བའི་ཚོགས་རྣམས་འཕེལ། །

རྣམ་གསུམ་ཤེས་རབ་རྒྱས་པའི་མཐུན་གྲོགས་རྣམ་དག་ཚུལ་ཁྲིམས་ལྡན་ནས་སུ། །

རྣམ་མཁྱེན་རྒྱལ་བའི་གོ་འཕང་མཆོག་ཉིད་མྱུར་བ་ཉིད་དུ་ཐོབ་པར་འགྱུར། །

 ༼ བོན་གཤེན་བསྭོ་སྒྲ་ལས་དྲངས།༽