ངའི་སྙིང་དབུས་ཀྱི་གསལ་འཚེར་ཉི་མ། |
[རྩོམ་ཁུངས།:བོན་གཤེན་བསྭོ་སྒྲ།] [ཟླ་ཚེས།:2013-10-23] [རྩོམ་པ་པོ།:ཀུན་ཁྱབ།] [ཀློག་གྲངས།:] |
ཡུལ་རྔུལ་རྫ་ཟལ་མོའི་སྒང་རྒྱུད་དུ།། གནས་བྲག་དམར་མེ་ལྕེ་མཆེད་འདྲའི་ཞོལ།། དགུང་སྐར་ཚོགས་ས་ལ་འཕོས་འདྲ་དེ།། དགོན་ཆེན་མོ་གཡུང་དྲུང་བསྟན་རྒྱས་གླིང་།། གླིང་དེ་ཡི་དབུ་གདུགས་འཁྱེར་སའི་ཡུལ།། མཁན་འོད་ཟེར་སྦྱིན་པའི་འོད་ཟེར་གྱིས།། བོན་གཡུང་དྲུང་བསྟན་པའི་པད་ཚལ་རྒྱས།། དཔལ་སྡེ་བཞིའི་ཕུན་ཚོགས་གཡང་དུ་ཆགས།།
བློ་རྣམ་རིག་བཀྲ་བའི་གཤེན་མཆེད་ཚོ།། བཤད་འདོད་ན་བཤད་གྲྭ་དེ་ན་ཡོད།། སྒྲུབ་འདོད་ན་སྒྲུབ་གྲྭ་དེ་ན་ཡོད།། སྒོམ་འདོད་ན་སྒོམ་གྲྭ་དེ་ན་ཡོད།། འཆད་ངག་གི་མཚོ་བྱ་དབྱངས་རེ་སྙན།། རྩོད་སྤོབས་ཀྱི་རིག་འཕྲུལ་གསེར་ཉ་འཁྱུགས།། རྩོམ་རྩལ་གྱི་རླབས་ཕྲེང་གཡོ་བའི་གནས།། བཤད་སྒྲུབ་ཀྱི་བསྟན་པའི་རོལ་མཚོ་ཆེ།།
ཤེས་ཡོན་ལ་བྲོད་པ་སྐྱེ་བའི་ཕྱིར།། དུས་དུས་སུ་གོང་མའི་མཛད་རྣམ་ཀློགས།། དུས་དུས་སུ་བཀའ་སློབ་ལམ་སྟོན་གནང་།། དུས་དུས་སུ་སྦྱོང་ཚན་རྒྱུགས་སྤྲོད་བྱེད།།
སྒྲིག་ཐོན་པའི་རིགས་ཀྱི་བུ་སློབ་རྣམས། ། ཕྱོགས་སོ་སོའི་ཡུལ་མིའི་རེ་འདུན་ལྟར། ། མཁན་སློབ་དཔོན་གསེར་ཁྲིར་མངའ་གསོལ་མཛད། ། གསུང་བརྟེན་འགྱུར་ཆེན་མོ་དཔར་བསྐྲུན་ཏེ།། གོང་བླ་ཆེན་རྣམས་ལ་སྤྱན་གཟིགས་བཤམས།། བར་དགོན་སྡེ་ཁག་ལ་རྟེན་བཞག་ཕུལ།། འོག་ཡོན་གྱི་བདག་པོའི་རེ་འདུན་བསྐངས།།
ལྷོ་འཛམ་བུ་གླིང་གི་སྒང་འདི་ལ། ཕྱི་འབྱུང་བ་གཡོས་པའི་འཇིག་པ་དང་། ནང་ནད་མུག་འཁྲུག་རྩོད་ཞི་བའི་ཕྱིར། གསོས་བདུད་རྕི་སྨན་གྱི་སྒྲུབ་ཆེན་བཙུགས།།
ཐུགས་བྱམས་བརྩེའི་འོ༵ད་ཟེ༵ར་སྦྱི༵ན་མཛད་པ༵།། བོད་ཁ་བའི་གསལ་འཚེར་ཉི་མ་ཁྱེད།། དུས་སྙིགས་མའི་གསལ་འཚེར་ཉི་མ་རེད།། ངའི་སྙིང་གི་གསལ་འཚེར་ཉི་མ་ཞིག །
མགོན་ཁྱེད་ཀྱི་གསང་གསུམ་དཀྱིལ་འཁོར་ལ། མ་བདེ་འགྲོ་སྲིད་པའི་རྒྱལ་མོ་སོགས། བསྟན་དམ་ཅན་རྒྱ་མཚོའི་ལྷ་ཚོགས་ཀྱིས། དུས་རྟག་ཏུ་མཐུ་སྐྱོང་བྱ་ར་མཛོད།།
དང་པོ་ལས་སྨོན་རྟེན་འབྲེལ་བཟང་པོས་འདུས་སྡེ་གཅིག་ལ་མཉམ་དུ་འཛོམས།། བར་དུ་གུས་སྦྱོར་བརྩོན་འགྲུས་བཟང་པོས་ཤེས་རིག་མེ་ཏོག་མཉམ་དུ་བཞད།། མཐའ་མར་ཚོམ་བུ་གཅིག་ཏུ་གྲོལ་བའི་སྒྲུབ་མཆེད་རྣམ་པ་དྲན་བཞིན་དུ།། བལ་པོ་སྤྲིན་གྱི་ཁང་བཟང་དབུས་ནས་ཡི་རངས་གཏམ་གྱི་མེ་ཏོག་འཐོར།
༼ བོན་གཤེན་བསྭོ་སྒྲ་ལས་དྲངས།༽
|