དེབ་ཉི་ཤུ་བ། རྫོགས་ཆེན་མན་ངག་བཀའ་བརྟེན་གྱི་སྐོར།
དེ་ཡང་བོན་སྐུ་ཀུན་ཏུ་བཟང་པོའི་སྙིང་གི་བཅུད་ཕུར་ཏེ།རིག་པ་ཐབས་དང་རྫུ་འཕྲུལ་གྱིས་བརྒྱུད་པའི་མན་ངགབླ་མེད་རྫོགས་པ་ཆེན་པོའི་བོན་སྡེ་གཅིག་པས་གཅིག་ཟབ་པ་མང་དུ་བཞུགས་པའི་ཡ་གྱལ།བོན་ཐམས་ཅད་རང་བྱུང་ཡེ་ཤེས་ཉག་གཅིག་ལས་གཞན་དུ་གྱུར་བ་རྡུལ་ཙམ་ཡང་མེད་པས་སྤང་བྱའི་མཐའ་ལས་གྲོལ་བར་འདོད་པ།སྣ་ཚོགས་སེམས་སུ་སྨྲ་བའི་རྫོགས་པ་ཆེན་པོ་དང་།གྲོལ་སྒྲིབ་སེམས་ཀྱི་ལ་བཟླ་བར་སྨྲ་བའི་རྫོགས་པ་ཆེན་པོ།བློ་བརྡེག་ཐལ་འགྱུར་དུ་སྨྲ་བའི་རྫོགས་པ་ཆེན་པོ་སྟེ།རྫོགས་ཆེན་སེམས་སྨད་སྡེ་དགུའི་སྤྱི་དོན་མཛུབ་ཚུགས་ཏུ་སྟོན་པའི་སུམ་ལྡན་གཡོར་མེའི་ཨ་ཁྲིད་ཐུན་མཚམས་བརྒྱད་དམ་བཅུ་བ་ཟུར་བཀོད་དང་།བྲུ་ཡི་ཨ་ཁྲིད་ཆེན་མོ་ཐུན་མཚམས་བཅོ་ལྔ་བ།འགྲོ་མགོན་བློ་གྲོས་རྒྱལ་མཚན་གྱི་གེགས་སེལ་མུན་སེལ་སྒྲོན་མེ་བཅས་ཀྱི་ནང་དུ་གཞིའི་ངོ་བོ་ཁྱད་པར་ལྔ་ལྡན་དུ་གཏན་ལ་ཕབ་ཅིང་།ལམ་གྱི་རིམ་པ་ཤིང་རྟའི་སྲོལ་དང་བསྟུན་ནས་རྒྱུད་མ་སྨིན་པ་སྨིན་པར་བྱེད་པའི་སྔོན་འགྲོ་མཐར་ཆགས་དང་།སྨིན་པ་གྲོལ་བར་བྱེད་པའི་ཁྲིད་ལ། མཚན་བཅས་སེམས་འཛིན། མཚན་མེད་མཉམ་བཞགརིག་པ་བོགས་འདོན། རང་འབྱུང་ཡེ་ཤེས་ངོས་འཛིན། འཇོག་བཤིག་སྐྱོང་གསུམ།ཡེ་ཤེས་ལམ་བསླང་བཅས་དང་། གྲོལ་བ་མཐར་ཕྱིན་པའི་ཁྲིད་ལ། གཉིད་ལམ་འོད་གསལ།སྣང་བ་གྲོགས་འཆར། རྟོག་པ་ལམ་སློང་།འབྲས་བུ་ངོ་སྤྲོད་སོགས་མདོར་ན་སྣང་བ་སེམས་སུ་ངོ་སྤྲད་པ་དང་།སེམས་མཐའ་བྲལ་དུ་ངོ་སྤྲད་པ། མཐའ་བྲལ་སྐུ་གསུམ་དུ་ངོ་སྤྲད་པ།སྐུ་གསུམ་འབྲལ་མེད་རིག་པ་རྐྱང་འདེད་ཀྱི་སྒོ་ནས་ཏིང་ངེ་འཛིན་གྱི་ཐུན་སྒོམ་དང་།སེམས་དཔའི་ངང་སྒོམ།རྟོགས་པའི་ཀློང་སྒོམ་གསུམ་མངོན་དུ་གྱུར་ཏེ་ཡེ་ཤེས་ཕྱོགས་མེད་དུ་འཆར་བར་བྱེད་ལ།དེ་དག་གི་སྐབས་སུ་ཉམས་ལེན་གྱི་སྐྱོན་བཅོས་དང་། ནད་གདོན་གེགས་སེལ་ལ།རྩ་རླུང་འཕྲུལ་འཁོར་གྱི་རིམ་པ་དང་། ཏིང་ངེ་འཛིན་གྱི་མི་མཐུན་པའི་ཕྱོགས་སྤང་བ།བར་དོའི་འཕོ་བ་ཡེ་ཤེས་ཟངས་ཐལ་བཅས་ལེགས་པར་སྟོན་ཞིང་།རྫོགས་པ་ཆེན་པོ་ཞང་ཞུང་སྙན་རྒྱུད་ཀྱི་དགོངས་བཅུད།ཉམས་རྒྱུད་རྒྱལ་བའི་ཕྱག་ཁྲིད་དུ་གཞི་རང་ངོ་སྤྲད་པ་གཅེར་མཐོང་ལྟ་བའི་ཁྲིད་དང་།ལམ་ཉམས་སུ་ལེན་པ་འོད་གསལ་སྒོམ་པའི་ཁྲིད།རྐྱེན་ལམ་དུ་སློང་བ་རྩལ་སྦྱོང་སྤྱོད་པའི་ཁྲིད།འབྲས་བུ་རང་ས་བཟུང་བ་སྐུ་གསུམ་དམར་ཐག་བཅད་པའི་ཁྲིད་སོགས་བླ་མེད་རྫོགས་པ་ཆེན་པོའི་ཟབ་དོན་གནད་ཀྱི་གདམས་པ་བྱུར་བུར་སྤུངས་པའི་བཀའ་བརྟེན་འདི་ནི་སུ་ལ་མེད་ན་དེ་ཉིད་ཐབས་ཆགས་ཡིན་ལ།གལ་ཏེ་ཡོད་ན་ངོ་མཚར་གཅིག་ཆོག་གི་གདམས་པ་ཚེ་གཅིག་སངས་རྒྱས་སྒྲུབ་པའི་ལམ་ཁྲིད་ཀྱི་མཐུན་རྐྱེན།ལུང་རིགས་ཉི་མ་འབུམ་གྱི་དཀྱིལ་འཁོར་འཛམ་བུའི་གླིང་ན་ཆེ་ཆེར་འཕགས་པའི་མན་ངག་བླ་ན་མེད་པ་དེ་ཡིན་ནོ།།
