དེབ་བཅོ་བརྒྱད་པ།   གསང་སྔགས་མ་རྒྱུད་ཀྱི་སྐོར།

      དེ་ལའང་ལྟ་དགོངས་སྤྱོད་འབྲས་སྔགས་རྒྱུད་ཆེན་པོ་ལྔ།དེའི་ནང་ནས་སྟོན་པའི་ཞལ་ནས་དུས་གཅིག་ཏུ་གསུངས་པའི་རྒྱུད་ཆེན་པོ་བདུན།ཁྱད་པར་མཐིང་འབྲང་རྩ་བའི་ཞལ་ནས་གཞི་ཡེ་སངས་རྒྱས་པའི་རྒྱུད།ཟངས་འོད་འབར་བའི་ཞལ་ནས་ལམ་མངོན་སངས་རྒྱས་པའི་རྒྱུད།ཀ་དག་ཡེ་ཤེས་ཀྱི་ཞལ་ནས་འབྲས་བུ་རྫོགས་སངས་རྒྱས་པའི་རྒྱུད་དང་གསུམ་གསུངས་ཡང་།དོན་ལ་དབྱེ་བ་ཐིག་ལེ་བཞི་བཅུ་རྩ་ལྔ་དང་། དེ་བསྡུས་པ་གཞི་དྲུག ལམ་དྲུགདོན་དྲུག་ལ་སོགས་པ་གསང་སྔགས་མ་རྒྱུད་ཀྱི་རྩ་བ་ཡན་ལག་གི་རྒྱུད་དང་སྒྲུབ་པ་ལས་ཚོགས་བསམ་གྱིས་མི་ཁྱབ་པའི་བཀའ་རྒྱུད་རིན་པོ་ཆེ་འདི་དག་གསང་འདུས་བཟང་ཟ་སོགས་ཀྱིས་མང་འབྲེལ་ཉུང་ངུར་བསྡུས་ཤིང་།ཡོངས་དག་ཀླུ་གྲུབ་སོགས་ཀྱིས་ལྷ་ཀླུའི་ཡུལ་ཁམས་ཀུན་ཏུ་དར་རོ།།འདི་དག་གི་འགྲེལ་བ་རྒྱལ་གཤེན་མི་ལུས་བསམ་ལེགས་ཀྱིས་མཛད་དེ།གཞི་ལམ་གཉིས་ཀྱི་རྒྱུད་དང་ཐིག་ལེ་བཞི་བཅུ་རྩ་ལྔ་དེ་དག་ས་བཅད་རྣམ་པ་ལྔ་རེར་གཏན་ལ་ཕབ་ནས་གསུངས་པ་དང་།འབྲས་བུའི་རྒྱུད་འགྲེལ་ཀུན་མཁྱེན་ཤར་རྫ་བཀྲ་ཤིས་རྒྱལ་མཚན་གྱིས་མཛད་པ་ལ།དང་པོ་རྩ་བ་ལུས་རྣམ་པར་བཞག་པ་དང་། གཉིས་པ་སྤྲོས་པ་ཡན་ལག་རྒྱས་པར་དོན་ལྔས་བསྟན་ཏེ།འབྲས་བུ་ཚེ་འདིར་ཐོབ་པ་དང་། ཐིག་ལེ་ཉག་གཅིག་ཏུ་ངོས་བཟུང་བ་དང་།མ་རྟོགས་ལོག་པའི་སྐྱོན་བསལ་བ་དང་། རང་རིག་རང་ལས་འཆར་ཚུལ་དང་།འགྱུར་བ་མེད་པའི་སྐུ་ཐོབ་ཚུལ་བཅས་དང་།གསུམ་པ་འབྲས་བུ་ཐོབ་རྟགས་ཀྱིས་མཐའ་བསྡུས་ཏེ་ལེགས་པར་བསྟན་ཡོད།གཞན་ཡང་དཔོན་སློབ་བསྟན་འཛིན་རྣམ་དག་གིས་མཛད་པའི་ཐིག་ལེ་མཆན་འགྲེལ་ནི།གཞི་རང་བྱུང་ཡེ་ཤེས་གཏན་ལ་ཕབ་པ་དང་། དོན་ཐིག་ལེ་ཉག་གཅིག་ཏུ་ངོས་བཟུང་བ།ཡང་དག་ཁྱད་པར་གྱི་རུ་ཤན་དབྱེ་བ། གསལ་བ་རང་རིག་གི་མྱོང་བ་བསྟན་པ།མཆོག་གི་གྲུབ་མཐའི་རང་གཞུང་འཆད་པ་སོགས་མ་རྒྱུད་ཡེ་ཤེས་ཐིག་ལེའི་དཀའ་གནད་ལེགས་པར་བཀྲོལ་ཡོད་པས་མཁྱེན་ལྡན་རྣམས་ཀྱི་དགའ་བའི་གསོས་སྨིན་དུ་འགྱུར་བ་གོར་མི་ཆག་གོ།