དེབ་བཅུ་དྲུག་པ།  ལྷོ་གཏེར་ཁྲོ་བོ་རྒྱུད་དྲུག་གི་སྐོར།

རྣམ་པ་ཐམས་ཅད་མཁྱེན་པའི་སྟོན་མཆོག་དེ་ཉིད་འོག་མིན་ལྷུན་གྲུབ་ཀྱི་ཡུལ་མཐའ་དབུས་མེད་པའི་གནས་སུ་ཡེ་གཤེན་གཙུག་ཕུད་ལ་སོགས་འཁོར་ལས་ལྡན་གྱི་ཚོགས་ལ་བསྟན་པ་ཡིན་ཡང་།དེ་ཡང་སེམས་ཅན་སྤྱི་མཐུན་གྱི་ལས་ཀྱིས་བསྟན་པ་ཆགས་འཇིག་དང་འཕེལ་འགྲིབ་ཅི་རིགས་བྱུང་བའི་འགལ་རྐྱེན་ལ་བརྟེན་ཏེ།བླ་ཆེན་པོ་དྲན་པ་ནམ་མཁས་གཏེར་དུ་སྦས།དེ་རྗེས་ཁྱུང་པོ་གྱེར་ཆེན་ཟླ་མེད་དང་ལྷ་སྲས་གཉིས་ཀྱིས་བཏོན་ཏེ་བྲག་ཕུག་ཉི་མ་རིས་སུ་སྔགས་ཀྱི་གཏེར་སྲུང་དྲུག་ལ་གཉེར་དུ་གཏད།ཕྱིས་སུ་གཏེར་སྟོན་ཁུ་ཚ་ཟླ་འོད་ཀྱིས་གཏེར་ལས་དྲངས་ཏེ་ཞལ་ཕྱེས་པ་ཡིན་པས།ལྟ་བ་ཁྱུང་ཆེན་གཡུང་དྲུང་གསང་བའི་རྒྱུད་ལ་ལེའུ་ཉེར་བཞི།རྫུ་འཕྲུལ་དྲྭ་བ་གཡུང་དྲུང་གསང་བའི་རྒྱུད་ལ་ལེའུ་སུམ་ཅུ།འགུ་ཡ་སྲོག་འཛིན་གཡུང་དྲུང་གསང་བའི་རྒྱུད་ལ་ལེའུ་ཉེར་དགུ།གསང་བ་དགུ་འཕར་གཡུང་དྲུང་གསང་བའི་རྒྱུད་ལ་ལེའུ་བཅུ་དགུ།དབལ་མོ་ལས་ཐིག་གཡུང་དྲུང་གསང་བའི་རྒྱུད་ལ་ལེའུ་སོ་གསུམ།གསང་བ་ཐབས་ཞགས་གཡུང་དྲུང་གསང་བའི་རྒྱུད་ལ་ལེའུ་བཅུ་དྲུག་བཅས་རྒྱུད་ཆེན་དྲུག་ལ་ཁྱོན་བསྡོམས་ལེའུ་བརྒྱ་དང་ང་གཅིག་གིས་གྲུབ་པ་འདི་ནི།གསང་སྔགས་བླ་མེད་ཀྱི་དགོངས་སྤྱོད་ཆ་ཚང་ཞིང་།བསྙེན་སྒྲུབ་ལས་ཀྱི་ཡན་ལག་སུམ་ཅུ་རྩ་དྲུག་གི་གོ་རིམ་ལེགས་པར་བསྟན་པས།གསང་ཆེན་རྒྱུད་སྡེ་རྒྱ་མཚོའི་བདག་ཉིད། སྟོང་སྙིང་ཡེ་ཤེས་སྙིང་པོའི་ཡང་བཅུད།རིག་འཛིན་མཁའ་འགྲོ་ཚོགས་ཀྱི་ཐུགས་དམ། ཟུང་འཇུག་སྒྱུ་ལུས་སྒྲུབ་པའི་འཕྲུལ་འཁོར།རྣམ་བཞི་རིག་འཛིན་སྒྲུབ་པའི་ལམ་སྟེགས།མཆོག་ཐུན་དངོས་གྲུབ་འབེབས་པའི་བདུད་རྩི་རུ་འཁུམས་པ་ཡིན།འདི་ཡི་དགོངས་དོན་བསྡུས་པ་རྗེ་རིན་པོ་ཆེ་མཛད་པའི་གསང་དོན་རྣམ་འབྱེད་ལ་སོགས་གཞུང་ལུགས་གསེར་གྱི་ལྷུན་པོའི་གཏོས་དང་མཉམ་པ་བགྲང་གིས་མི་ལང་བ་བཞུགས་ཡོད་དོ།།