དེབ་བཅུ་བཞི་བ།   སྡེ་སྣོད་མཛོད་རྩ་འགྲེལ།

     སྙིགས་དུས་ཀྱི་འཇའ་ལུས་པ་ཆེན་པོ་ཀུན་མཁྱེན་ཤར་རྫ་བཀྲ་ཤིས་རྒྱལ་མཚན་གྱིས་མཛད་པ་ཡིན་ཅིང་།དེ་ལ་ཐུན་མོང་མ་ཡིན་པ་གཡུང་དྲུང་ཟབ་མོའི་ཚིག་རྐང་བཞི་སོགས་དབྱིངས་ནས་ཡེ་ཤེས་མཁའ་འགྲོ་མས་ལུང་བསྟན་ཐོབ་པ་སོགས་སྐྱེས་སྟོབས་ཀྱི་ཤེས་རབ་དཔལ་དུ་འབར་བ་ལས་ཐུགས་བཅུད་ཕྱུང་ཞིང་།གཞུང་འདི་ལ་མདོ་སྔགས་རྫོགས་ཆེན་གྱི་གདམས་པ་མ་ལུས་པའི་གནད་ཚང་ལ།གང་ཟག་གཅིག་གི་ཉམས་ལེན་དང་ཆ་རྐྱེན་དུ་དམིགས་ནས་བསྟན་པར་མ་ཟད།ལེའུ་དང་པོ་ནས་བཅུ་བའི་བར་སླ་འགྱུར་གྱི་སྡེ།གཉིས་ཀ་མ་ཡིན་པའི་སྡེ་གཉིས་ཀྱི་ཆར་གྱུར་བའི་རྒྱུ་མཚན་ཉིད་ཀྱི་ཐེག་པ་བསྟན་ཅིང་འགྲེལ་ཡོད་པ་ལས།མཚན་ལྡན་བཤེས་གཉེན་བསྟེན་ཚུལ་དང་། བློ་ལྡོག་བོན་བཞི།སྐྱེས་བུ་ཆུང་འབྲིང་གི་ལམ་དང་འབྲེལ་བའི་ཐར་བ་ཆེན་པོའི་ཕན་ཡོན།སྐྱབས་སེམས་དང་ཕར་ཕྱིན་ཕྱི་མ་གཉིས་དང་བཅས་པ་རྒྱས་པར་གསུངས་ཡོད་ལ།ལེའུ་བཅུ་གཅིག་པ་ནས་བཅོ་བརྒྱད་ཀྱི་བར་དུ་ཐབས་ཆེ་སྒོ་ཡངས་གསང་བ་སྔགས་ཀྱི་གྲུབ་མཐའི་རྣམ་བཞག་བཤད་པ་དང་།ལམ་གྱི་འཇུག་སྒོ་དབང་བཞི་སོ་སོར་ཕྱེས་པ།ཉམས་སུ་བླང་བྱ་ལྟ་སྤྱོད་སྒོམ་པ་དང་དམ་ཚིག་ཕྲིན་ལས་ལྔས་རྣམ་པར་བསྟན་ཏེ།གྲོལ་བྱ་རྫོགས་རིམ་གྱི་ཐབས་ལམ་གཏུམ་མོ་དང་།ཉིན་སྣང་ལམ་དུ་ལྷོངས་པ་སྤྱོད་པ་དང་སྒྱུ་མ། མཚན་སྣང་ལམ་དུ་སློང་བ་རྨི་ལམ་དང་འོད་གསལ།འཆི་སྣང་ལམ་དུ་བྱེད་པ་འོག་སྒོའི་གདམས་པ་སོགས་ཚེ་ལུས་གཅིག་ལ་ཡེ་ཤེས་བླ་མེད་ཀྱི་ས་ལ་མངོན་པར་གྲོལ་བའི་གདམས་པ་ཁྱད་པར་ཅན་བསྟན་པ་དང་།ལེའུ་བཅུ་དགུ་ནས་ཉེར་གཅིག་བར་ཐེག་པ་ཐམས་ཅད་ཀྱི་རྩེ་མོར་གྱུར་ཅིང་འཁོར་འདས་ལམ་གསུམ་གྱི་མཐའ་རུ་ཐུག་པ།བོན་སྒོ་བརྒྱད་ཁྲི་བཞི་སྟོང་གི་བརྗོད་བྱ་ཤིན་ཏུ་ཟབ་པ།རང་བཞིན་རྫོགས་པ་ཆེན་པོའི་གཞིའི་གནས་ལུགས་གཏན་ལ་ཕབ་སྟེ།སེམས་ཀློང་མན་ངག་གི་སྡེ་གསུམ་ལས། དགོས་པ་བཞི་དང་གདེངས་ཚད་གསུམ།བྱ་བྲལ་ལྔ་ཡིས་བོན་ཉིད་ཀྱི་དོན་ལ་ཆེན་བཟླ་བ་དང་།ཁྱད་པར་དུ་འོད་གསལ་ཐོད་བརྒལ་གྱི་མན་ངག་ལ་བརྟེན་ནས་ཕྱི་འབྱུང་བ་དེངས་པས་གཟུང་འཛིན་གྲོལ་བ་དང་།ནང་འབྱུང་བ་དག་པས་ཤ་ཁྲག་གདོས་བཅས་ཕུང་བོ་འོད་དུ་ལྷག་པ།འཁྲུལ་ཤེས་ལོག་པའི་བག་ཆགས་དང་བཅས་པའི་ཡུལ་ཤེས་ལྷ་སྐུར་ཤར་ཏེ།སྐུ་གསུམ་ལམ་དུ་ཆོད་ཅིང་བདེ་ཆེན་དབྱེར་མེད་གཡུང་དྲུང་གི་ས་ལ་ཅིག་ཅར་མནོས་ཤིང་།ཀ་དག་གཞོན་ནུ་བུམ་སྐུ་ཀློང་དུ་གྲོལ་བའི་གདམས་པ་ཁྱད་དུ་འཕགས་པ་འདི་ནི་ཐར་བ་དོན་གཉེར་གྱི་ལས་ལྡན་རྣམས་དང་རང་གཞན་སྐྱེས་འཕགས་ཀུན་གྱི་ཡིད་བཞིན་གྱི་ནོར་བུའི་ཚུལ་དུ་གཙུག་ཏུ་བཀུར་བར་འོས་སོ།།